眾星心「韓」

北韓預言爆發「熱核戰」，南北戰事如箭在弦，不少擁有韓國血統的歌手藝人包括衞蘭、宋芝齡及DJ Donald（唐劍康）等均擔心身在韓國的親人及人民安全，一眾藝人又望世界和平，不要有戰爭。

剛到首爾旅行的梁政珏：尋日都同朋友傾開，自己唔熟政治，但每個人聽到世界有戰亂，就算唔係自己國家都會唔開心同擔心，希望世界和平。

中韓混血兒宋芝齡：媽咪啱啱去咗韓國，但佢同親戚都住喺近中國嘅位置，所以應該唔會打到去，都有少少擔心，暫時冇諗住叫媽咪快啲飛返嚟，睇情況。

菲韓混血兒衞蘭：媽咪依家仲喺韓國，等我打電話畀佢了解吓情況先，未收到任何消息，如果韓國真係有危險會立即叫媽咪離開韓國，嚟香港住我屋企先，其實都好耐冇同媽咪住。

中韓混血兒洪天明：媽咪依家喺香港，但佢啲親戚喺韓國。（擔心？）唔知，我諗唔會喺咁嘅形勢亂嚟，嗰邊都有呼籲外國人疏散。（會叫佢哋小心啲？）小心都冇用，睇定啲先，應該唔會太離譜，南韓咁多人，要走一日都走唔切啦！

中韓混血兒Donald：媽咪係韓國人，我3歲時父母離婚，所以同媽咪、韓國嘅親戚好少聯絡，但知媽咪依家喺香港，唔擔心佢。唔係因為我係混血兒而特別留意呢單新聞，全世界人都好關心韓國人民嘅安全，我諗所有韓國人民都唔想打仗，只想世界和平。