霆鋒寧波返港擔心囝囝冇搵前妻

憑電影《消失的子彈》問鼎今晚《華鼎獎》影帝的謝霆鋒，昨午一時許從寧波返港，心情大靚的他透露剛出席朋友聚會，談到H7N9禽流感疫情在內地擴散，霆鋒呼籲大家多注意個人衞生及勤洗手，更坦言擔心兩個囝囝Lucas及Quintus。將於明日出席頒獎禮的他，被問到有否信心奪影帝？他說：「再算啦！（網民投票你領先喎！）我都冇留意。（前妻張栢芝參加內地跳水節目，有冇打畀佢？）冇呀！（好多參加藝人受傷，擔心栢芝？）佢有準備，唔好當個節目傻。」

另外，霆鋒上周日秘密到寧波「象山大目影視城」參觀，雖然戴上Cap帽，仍被眼利的網友認出，成為當地的新「景點」。有網友表示霆鋒拒絕拍照，不過亦有網友成功與他合照，更上載微博大晒「戰利品」。