愛繪畫驚捱窮

除了樂器，Leanne亦喜歡繪畫，當年在加拿大讀大學時主修繪畫，不過她笑言當年的教學方法十分「自生自滅」：「我主要係學素描同油畫，但其實老師冇特別教任何嘢，通常都係搵個裸體模特兒入嚟，然後叫我哋自由發揮咁畫，技巧要靠畫多啲掌握。老師主要係教我哋點樣表達Concept（概念），而且亦唔需要畫得好靚。」談到素描與油畫的分別，她說：「油畫可以由深畫到淺，畫深咗可以加一筆抹番佢，但素描就唔可以，畫深咗冇得擦咗再嚟過，所以要由淺慢慢畫。」

Leanne透露最滿意的作品是以創意取勝：「我好記得有幅素描，雖然有個模特兒畀我照住畫，但我喺上面憑空想像加咗好多商標，例如加啲Barcode（條碼）落一個人嘅背脊。嗰幅畫我主要想表達呢個世界好物質，好多人覺得買名牌就代表到身份。」她又指從繪畫風格可以看出一個人的性格：「有啲人好細心嘅，佢啲筆畫會落得好幼細，我就懶型咁，鍾意用粗筆畫去表達，而且我好少畫靚女，反而鍾意畫老人家啲皺紋，因為我覺得皺紋可以代表一個人嘅故事。」

至於為何鍾情畫畫，她說：「我爸爸係設計師，我好崇拜佢。佢畫毛澤東出身嘅，以前就算成四五層樓咁高嘅毛澤東像，我爸爸只要用個架爬上去就可以畫到，我覺得佢好叻。」那麼假若沒有選美，會否選擇畫家作終身職業，她說：「我會做設計師，唔敢做畫家，驚會好窮。」