李亞男情歸長笛

為了將李亞男打造成「完美女神」，李媽媽自她五歲開始已要她學鋼琴，雖然最終因鋼琴老師太兇狠令她半途而廢，但亞男還是成功開發了音樂才藝，無論長笛或結他都「駕馭」得頭頭是道，參選溫哥華華裔小姐時更以吹奏長笛作才藝表演。

李亞男（Leanne）除溫文爾雅的態度令人目眩神迷外，其音樂才華亦令人為之佩服。由於李媽媽想將她打造成「完美女神」，Leanne五歲開始已苦練鋼琴：「我學到八、九歲就冇學喇！所以已經唔係好記得點彈。嗰時個鋼琴老師好惡，成日打我，只要我一唔啱音或者彈錯咗，佢就會成把間尺打落我啲手指度，你知啦，對咁細個小朋友會有童年陰影o架嘛！不過我好乖o架，就算畀老師打我都忍住唔敢出聲，因為我覺得媽咪同婆婆想我學咩就要學咩。好彩我媽咪喺我9歲嗰陣突然問我：『囡，你仲想唔想學落去？』我終於等到機會表達自己嘅感受，我就同佢講唔係咁鍾意鋼琴，佢哋亦冇再勉強我喇！」

吹完頭暈

雖然如此，Leanne與音樂的緣分並未因此畫上句號，在加拿大長大及讀書的她，初中時因為學校規定每個人都要學樂器，令她開始接觸長笛（Flute）。問到為何對長笛情有獨鍾，她說：「我覺得拎住長笛吹奏個感覺好靚，本身我有諗過學單簧管，但我唔鍾意啲聲有啲刺耳，長笛嘅音色悅耳優美好多。」不過要駕馭長笛絕非易事，Leanne笑言每次吹奏完定必頭暈：「唔知細個係咪因為少唱歌，丹田氣唔係好夠，每次吹完都覺得好暈，因為冇乜機會抖氣。長笛好得意嘅，通常要先吸一大啖氣，然後一口氣吹好多句，都幾考功力o架。最要注意嘅係唔可以畀人聽到有抖氣聲，否則好肉酸，」

偷雞咪嘴

凡事愛為人着想的Leanne笑言當年與同學一起練習演奏時，每到高音部分便會自動「咪嘴」，因為擔心累街坊：「我係一個超唔鍾意影響到大家嘅人，我唔想因為一粒音搞禍成件事，所以每次合奏去到高音位，我都會吹得特別輕，或者作晒狀好用力咁吹，其實係咪嘴偷咗雞嘅，哈哈！嗰陣其實成班同學都係柴娃娃，但我好Enjoy嗰種Teamwork嘅感覺，我覺得出嚟嘅感覺好Professional（專業）。」

Leanne學了一年長笛後再次「荒廢」，時間更達七年之久，直到參選溫哥華華裔小姐前夕，她才回想起闊別多年的「好友」：「嘻嘻，因為選美要才藝表演，我嗰時又長頭髮喎，覺得吹住長笛，啲頭髮同條裙一齊飄飄吓成件事好靚好加分，所以就揀呢樣嘢嚟表演。」為了重拾演奏技巧，她請老師特訓，短短兩個月已吹奏得似模似樣：「我都覺得自己有啲音樂天分嘅，不過我驚自己唔夠氣，都有狂練o架，每日兩個鐘咁多咯。」自從那次表演後，她重拾對長笛的興趣，偶爾還會挑選它為出騷的伴侶呢！