司馬燕Reborn荷蘭補搞婚禮

早前《好報》獨家報道藝人司馬燕患胃癌，要割除整個胃部，休養中的她獲老公吳忠義送大禮，原來其夫婿計劃今年7月在老家荷蘭為她補辦婚禮，彌補當年未行婚禮的遺憾。

現正康復的司馬燕被指今年7月在荷蘭再舉行婚禮，昨日記者致電求證，她說：「其實可以話係結婚周年派對。我同老公喺96年結婚時，原本已經喺荷蘭Book咗個堡壘舉行婚禮，但我媽媽咁啱喺嗰年過身，所以先唔大搞，改為返香港低調食餐飯。當年我哋冇簽字，係生咗細仔之後先喺美國拉斯維加斯註冊。老公好錫我，佢一直都內疚好似欠我一個Wedding咁。今次當係一個Excuse都好，慶祝我哋結婚周年同埋我康復。」她又大讚老公細心：「佢叫我乜都唔使諗，到時飛個人過去就得喇！」

司馬燕透露Party當日不會穿婚紗，會有DJ駐場，還有色士風演奏，老公更會即場獻唱，她形容這個Party就像是她的Reborn（重生）一樣。昨日她原要進行第五次化療，但因血小板過低要押後：「因為過年時成日出去拜年，老公下咗宵禁令，夜晚11點後唔畀我上網同埋用手機。」

逾百親友出席

她說現時體重是37-38kg（約83磅），希望屆時可以增磅漂亮些，預計當日有逾百親友出席，包括好友吳麗珠和周美鳳等。另外周美鳳和名模琦琦等組成「Dirty Club」搞聚會，齊齊着皮褸皮褲上陣。