峯語戀升溫默認同房
無綫小生林峯最近成功鎅掂影壇新貴吳千語後,趁新正頭、20日內橫跨歐亞蜜密精華遊!二人昨晨前後腳從米蘭返港,千語晚上出席慶功宴時,對於同房瞓不置可否,還怕醜地表示要一步一步來,擔保不怕意外「搞出人命」!
今年林峯事業愛情豐收,自做了男人應該做的事,賜名分給女友吳千語後,趁農曆新年放大假與千語精華遊!大年初一先從上海飛往東京歎世界,返港後再飛沖繩曬陽光,想不到還未夠喉,連時尚之都米蘭都唔放過,還去了「翡冷翠」佛羅倫斯!「峯語」於短短20日內足迹橫跨歐亞大陸,估計使費至少50萬元!
百密一疏露鑽戒
林峯與千語昨晨從米蘭秘密返港,更刻意前後腳步出機場,一身黑色打扮的林峯率先出閘,推着3大箱行李步出,精神飽滿兼滿面春風,問到去哪裏玩?他只說:「我仲放緊假,唔需要交代!」問到女友在哪裏?他不耐煩地說:「依家我放假,唔使畀埋行程表你哋嘛?」再問20日去三次旅行是否很開心?他更九唔搭八講早晨。相隔10分鐘,架上墨鏡的千語兩手揈揈步出,相信行李全由林峯代勞。如沐春風的她,左手食指戴上鑽石戒指,但全程雙手插袋,問到是否刻意隱藏戒指?她報以甜笑沒有回應,更與男友口徑一致指放假不願談私事。隨後由男性友人陪同乘的士離開,不過在打開的士車門之際露出鑽戒,可謂百密一疏!
晚上,千語出席新片《百星酒店》慶功時,提起林峯便露出絲絲甜笑,對於同房瞓、結婚,甚至男友遲到等問題,更有問必答!對比早前從東京京蜜遊返港時,她口震震說:「我哋有男有女,呢啲太私人嘅嘢唔想講,但係分開房!」今次大方得多!
佛羅倫斯睇建築
吳:吳千語 記:記者
記:去完旅行好開心?
吳:多謝,我哋去咗米蘭同佛羅倫斯!
記:愈去愈遠?
吳:分開幾次去,本來一早想去遠啲,因為中間要返香港,所以冇一次去太遠!
記:今次兩個人去?
吳:嗰邊有朋友喺度!
記:係咪同房?
吳:(一臉怕醜)太私人嘢唔會回應!
記:係咪會秘婚?
吳:唔會,結婚係開心事,如果結婚一定會公開。
記:畀人影到你戴戒指喎?
吳:係我自己買,唔係佢送畀我,大家到另一階段先會收,總之依家係男女朋友關係!
記:今次係分房定同房?
吳:(九唔搭八)今次主要去睇建築,因為佢(林峯)以前讀過呢科。(對於是否同房不置可否)
記:怕唔怕意外懷孕?
吳:絕對唔會,一定一步一步嚟!
記:係咪未到呢一步?
吳:係,一定要結婚先會!
記:因為你信基督教?定你媽咪家教好好?
吳:唔係,我媽咪係佛教徒!
記:媽咪有冇教你好好保護自己?
吳:結婚係人生大事,好重要,尤其係女仔,一定要有好圓滿計劃!
記:公司有冇詐型?
吳:冇,以後工作會認真投入啲!不過去完旅行真係好輕鬆!
認遲到:要我催佢
記:林峯成日遲到,對你係咪咁?
吳:佢平時都有咁嘅問題,有時仲要我催佢!不過我好欣賞佢細心!
記:林峯好浪漫?
吳:佢平時嘅嘢我都估到!
記:會唔會喺嗰邊結婚?
吳:未諗到咁長遠!
記:滿唔滿意男友?
吳:好滿意,好好!
記:男友平時叫你BB?
吳:好多人都係咁叫我,我就叫佢原名阿文(林匯文)!
記:佢啲粉絲平時叫佢Honey?
吳:唔知喎!我唔會咁叫佢!
問到林峯何時放完大假?其經理人說:「今日(昨日)放完,3月3日復工出席簽唱會!(米蘭之旅?)唔知佢嘅行程!(佢哋被指秘婚?)冇聽過阿峯講!」此外,林峯早前拍攝新片《忠烈楊家將》時,由於有九成戰爭戲份需騎馬,他自爆騎到屁股甩皮,食飯時也不敢坐住食。
林峯率先推行李車出閘,看來春風滿面,唔攰喎!
千語BB跟林峯去完旅行充夠電,連秀髮都開心到飄起,Yo!
吳千語上到車即鬆懈,手上的戒指無所遁形!
千語被逼供時又露戒指,看來又驚青又冧呢!