黃婉曼「死」過翻生

由天氣女郎轉為主持的黃婉曼10年前曾是高考狀元，但高學歷並無讓她成為專業人士，反而入了娛樂圈成為「百足」主持。回想昔日做世界盃的非人生活，冇覺好瞓的她曾向化妝師要求睡着覺化妝，後來卻驚覺如此做法跟死人無異，自此她在任何情況下也打醒十二分精神，做個全能藝人！

還記得2003沙士那年，「新移民」粘冰冰在高考時考獲3A1C的佳績，傳媒對這位高材生另眼相看，除封稱她為狀元外，還紛紛上前取經，訪問她有甚麼考試秘笈，當時外表清純、架上一副眼鏡的冰冰說：「我希望盡力做好所有事，然後每一日活得精彩！」也許你會想像現時的冰冰已成為了濟世為懷的醫生，或是雄辯滔滔的律師，不過勢估唔到10年後的今天，她卻在娛樂圈打滾，由「天氣女郎」搖身一變，成為「百足主持」，這個人就是黃婉曼。

今日的黃婉曼沒有了昔日的稚氣，取而代之的是一種女人味。她大學還未畢業，就已在無綫做實習，那時的她心口掛個勇字，由朝做到晚：「以前我上晝9點至晚上7點做《新聞透視》記者，晚上11點8就報天氣！當時真係意志消磨，報天氣攰到讀錯嘢！但我同自己講，觀眾唔會知你攰，所以一定要提起精神！」

懷念純真時

婉曼不僅讓自己提起精神，其自創的生鬼報天氣手法，也令觀眾精神一振，瞬間便引起回響，這也是她始料不及：「因為當時嘅我好鍾意做呢樣嘢，所以唔怕辛苦。我唔係為錢，亦唔覺得自己會紅，我發覺只要莫問回報，就會有好成果，反而太計較就乜都得唔到。我好懷念當時嘅自己，因為初初畢業嘅我做任何事都勇往直前、好大熱誠，我永遠都覺得當時嘅感覺係最Fresh、最純真！」

「記得做世界盃嗰陣，日日要六、七點起身化妝，下晝要喺商場講波，半夜又去TVB講波，凌晨4點先返到屋企，到第二朝7點又再起身，日日都係咁！仲要加埋搵資料、寫稿，我幾乎係冇瞓過覺。」不過鐵人都有捱不住的時候，正當她想要求歇一歇時，意志再一次讓她站起來：「我記得有一日，我同化妝師講：『我可唔可以瞓喺度化妝？』化妝師都未講，我就諗有乜人係會瞓喺度化妝？答案係死人，原來人死咗先有得抖，結果我從嗰刻起，決意提起精神繼續做落去！」

為性感懺悔

婉曼由新聞界轉戰娛樂界，成為主持，恍如解開了專業形象的枷鎖，走進了花花世界的遊樂園。她為配合入場Dress Code，不時性感出席活動，因此成為媒體的焦點！而報道內容大多描述其外貌和身材，婉曼坦言對此曾一度適應不來：「以前睇關於自己嘅報道，無端端都會喊，好驚畀人冤枉！好多時自己真正性格從報章睇唔到，佢哋唔會提你嘅工作表現，只會問點解着得咁性感。以前會好嬲自己，覺得自己唔啱，直情試過寫專欄懺悔，但做耐咗，又會反思自己係咪太保守？其實着晚裝都可以好靚。」

婉曼深信懂得感恩，全力做好工作，才是最重要，其他東西別想太多：「好多人入咗呢行好耐都未能得到人哋認同，而公司畀咗好多重要嘅節目我做，已經覺得好幸運！只要有得做，我都會盡力做好，絕對唔會被名利沖昏頭腦。」

雖說娛樂圈是大染缸，但聽過她的一番話後，突然覺得這個黃婉曼跟當年的高考狀元粘冰冰沒有分別，亦從沒改變，除了眼睛閃爍着一樣的自信外，更重要是保持同一種生活態度！

後記：檸檬茶的啟示

婉曼笑言在所有飲品中，最愛喝的是檸檬茶，故即使接受訪問時也不停喝檸茶。其實檸茶跟她的人生有點相似，檸檬是酸，正好代表被攻擊時感到心酸，紅茶是淡淡的苦，則表示為搏殺徹夜未眠之苦，幸好還有糖這調味料，就算是再苦再酸，一想到家人、男友和公司的支持，甚麼都能夠捱得過。不知道婉曼如此愛檸檬茶，是不是這個原因呢？