G.E.M.擺林宥嘉上枱避是非

近期負面新聞不斷的歌手G.E.M.（鄧紫棋）為了中斷和前輩甄妮的罵戰，昨日到電台宣傳時即場表演騎呢「軟骨功」，更不惜將男友林宥嘉擺上枱，講明30歲前要結婚，並暗示男友求婚要多花心思！

女歌手G.E.M.昨日到電台宣傳四月舉行的演唱會，為免與前輩甄妮再掀罵戰，G.E.M.惟有利用一向甚少提及的男友林宥嘉轉移視線。問到有否邀請林宥嘉睇騷時，她先扮傻地說：「請咗好多人喎！」其後才表示男友會專程來港捧場：「唔知佢會唔會上台，唔好搞啲咁嘅嘢嚇我！」又指要男友自掏腰包買飛，問到是否買1,280元VIP飛到後台探班時，她撒嬌說：「如果要嚟後台參加導賞團就要自己買飛啦，但係賣晒喇喎！」

為個唱排辣身舞

對於有報道指其公司發聲明，表示從Fans口中得知G.E.M.完騷後便會結婚，她笑說：「流到爆，個聲明假到不行!」她又指希望30歲前結婚：「其實我19歲嗰時係講過想22歲結婚，不過我都就嚟22歲，有啲驚！」問到男友會否上台求婚時，G.E.M.尷尬地說：「唔係咁變態嘛？（會接受？）一嚟就話接受，人哋仲使諗點求婚嘅？」擺明暗示林宥嘉求婚要多花心思！

而自稱「軟骨人」的她即場大騷軟骨功將自己「對摺」，並笑說：「細個睇Twins演唱會做一字馬，我又跟住做，點知一跳起落地就做到。聽人講天生筋骨軟唔識高，所以我咪好似啲體操運動員咁矮！」又透露下月將和演唱會舞蹈員開會排舞，會為快歌度身打造辣身舞，令人期待。