Bobby出院哭吻老婆

因急性肺炎入院的歐陽震華（Bobby），一度在ICU搶救12小時，死過翻生！昨日他出院時明顯瘦了一圈，眼見連日擔心又頻撲的太太，他坦言很肉赤，更忍不住與太太相擁落淚，場面感人！他承諾以後玩同食都會收斂，並輕吻太太以示謝意。

大年初二晚，Bobby與好友歡聚期間突感不適，一度抽筋及昏迷，被送往灣仔律敦治醫院深切治療部（ICU）搶救12小時，險變植物人！死過翻生的他，昨日在太太陪同下出院，期間二人相擁落淚，Bobby更送上一吻以示感謝。

昨晨11時，Bobby的經理人Lydia拿着一碗粥抵達醫院，約45分鐘後，其太太傅潔嫻帶同一袋衣物接丈夫出院。12時許，頭戴灰色冷帽的Bobby笑容滿面地現身，雖然瘦了一圈，但雙眼有神，更高舉勝利手勢！他表示身體已好得8、9成，更大讚醫生及工作人員處理得相當好：「我半夜3點昏迷，第二日下午2點扎醒，插喉時有知覺同意識，只係手腳唔郁得。插喉時好辛苦，真係唔好再試！」

心急見愛犬

談及清減不少，Bobby即心痛地說：「太太瘦得仲多，我都好肉赤！」說罷即示意太太走到身旁，並來個深情擁抱，太太忍不住落淚，在旁的經理人Lydia亦喊埋一份，Lydia說：「我唔係細你好多，唔好再嚇我。」Bobby即說：「太太都受驚，比我更需要補番吓，我應承佢，以後飲食方面檢點啲，總之樣樣7成，玩同食都唔會咁盡，好多同事、內地Fans都好關心我。」他邊說邊流下男兒淚，其後錫了太太一啖，場面感人！他又笑言出院第一件想做的事是返家見愛犬：「老婆話隻狗好掛住我，成日入房搵我。」

拒承諾戒酒

Bobby透露出事導火線是昏迷前一晚又食海膽又食肥牛，吃得太飽，第二日與朋友玩時終出事，食物入錯氣管，問到是否與飲酒有關，他說：「我係有飲，但之前去飲宴，大家都冇影到我醉酒，證明我唔係豪飲！（戒酒?）唔想開空頭支票，唔想呢頭話戒酒，轉個頭就畀人影到揸住杯酒，唔通應酬揸住杯茶咩！除非換晒啲朋友，不過以後會適量。」他心痛地表示太太及經理人辛苦過他，看報道時覺得二人比他面青！

談及留院情況，他透露做過物理治療，主要是清痰，休息數天後便復工拍攝新劇《情逆三世緣》，其後到佛山拍外景，當中有不少槍戰及追逐戲：「不過之前打咗強心針，隻手伸唔直，未揸到槍住！」

保護氣管戒凍飲

Bobby康復出院，關嘉美醫生提醒他好好保護氣管，慎防感染呼吸道疾病：「佢之前肺炎入院，出院後要好好保護氣管，特別最近正值流感高峰期，外出最好戴口罩防感染。」至於飲食方面，她說：「吞嘢唔好太大啖，小心落錯格，盡量唔好飲凍嘢，飲酒亦要適可而止！」