梁家輝返無綫拍劇

曾志偉昨晚拉大隊出席賀歲片首映，譚詠麟及葉玉卿等均以七十年代造型亮相。有傳志偉拉攏巨星返無綫拍劇，他坦言梁家輝成數較高，劉嘉玲今年應該不會成事！

賀歲片《2013我愛HK恭囍發財》昨晚假新光戲院舉行慈善首映，監製曾志偉率領一班戲中演員譚詠麟（阿倫）、葉玉卿（卿卿）、黃宗澤（Bosco）、徐子珊及陳百祥等大晒冷，他們更配合大會主題以七十年代扮相示人，最後Bosco及徐子珊獲頒最佳衣着男女演員。而高海寧則以大露背裝上陣，成功搶鏡！一眾演員向台下派朱古力金幣，志偉更將金元寶擺設擲落台！

嘉玲今年不成事

對於有指志偉拉攏多位巨星返無綫拍劇，他說：「搵梁家輝絕非吹水，不過劉嘉玲今年唔得，周潤發太遙遠，應該唔會合作到！家輝話自己係TVB出身，身上流住TVB嘅血，只要佢肯拍，我都會奉陪！」

至於卿卿梳了個七十年代髮型，提到有指拍電視劇，她直言有見過編劇，新劇乃電影《桃姐》班底：「編劇話我係第一人選，有30集，要拍3個月，唔知捱唔捱到，不過冇乜可能！（老公）最後都係Say No！」對於《我》片與黃百鳴及周星馳的電影打對台，阿倫希望大家一齊好，有機會都會欣賞對手的電影。

黃宗澤祝福舊愛

此外，Bosco笑笑口回應包養兩女的傳聞：「咩呀？助手嚟o架！我拍嘢咁忙，邊有咁多精力有兩條女？」有指舊愛胡杏兒有新歡，他說：「好嘅女仔梗係多人追，冇話走唔走寶，開心事嚟，恭喜佢！冇酸溜溜！我唔恨拍拖！」對於前輩返無綫拍劇，他與子珊都大表歡迎，直言只要有得合作，就算過鏡都冇所謂。