林峯談閃婚冧爆面紅

近日娛圈喜事重重，未知林峯是否受幸福氣氛感染，早前在演唱會上默認吳千語是「BB」，昨日更有報道指二人返老家廈門「閃婚」！昨日阿峯否認傳聞，但一提起「千語BB」即尷尬面紅！

被指跟「千語BB」玩「閃婚」的林峯昨日現身電台宣傳新碟，記者立即向他送上祝賀，但他說：「人哋Send畀我先知，咁好笑嘅？真係愈作愈離譜，唔好咁啦！」並稱不要因鄭伊健和蒙嘉慧的婚事而拉他落水。雖然阿峯把口唔認，不過一提到「千語BB」，他面上即時泛起甜蜜笑容：「對住你哋梗係笑啦！唔通喊咩？」對於結婚傳聞，平日口齒伶俐的他開始語無倫次：「吓？我以前……你講……冇……唔關事，咩呀你講咩嘢？」問到報道指他帶「千語BB」見家長，他立即「回魂」兼睩大雙眼說：「吓？冇咁嘅Plan！」隨即又掩面說：「冇呀！冇見過家長！」

尷尬掩面

問到是否正跟「千語BB」拍拖，林峯Chok了一個沉思Look整整5秒，然後萬分尷尬地再度掩面：「唉！唔知，唔知，唔知呀！激死我喇！真係！」但突然又認真地否認林父不滿意吳千語的傳聞：「真係唔好牽涉到屋企人，有啲報道作到離晒譜，呢樣我好認真，真係唔好咁樣！」對於記者追問是否拍拖，他只不停掩面：「放過我啦你哋，即係我希望……放過我啦！」更猶如小女孩般滿面通紅，並重申不要牽涉到家人，問到是否怕影響到「千語BB」的家人？他再度默認：「係啦！幾唔好意思，入面啲嘢唔屬實，作得就作。」並叫記者幫忙不要再亂作。完成訪問前，記者再問到其經理人樂易玲可知道他拍拖？阿峯即雙手合十說：「如果我拍拖佢會知。」說畢才如釋重負地離開。而無綫高層樂易玲昨日出席首映禮時，對於有傳阿峯與「千語BB」閃婚，她表示根本不是事實，亦冇可能，不用向阿峯求證。