鍾舒漫白果唔怕食

前晚舉行的《十大中文金曲頒獎禮》可謂「有人歡喜有人愁」，跟Jade同食白果的歌手有林欣彤、鍾舒漫、洪卓立、農夫、陳柏宇及樂隊Closer等，但他們比較豁達，反指出席「冇獎頒獎禮」是樂事。鍾舒漫自言非首次在頒獎禮白坐一晚，故已學識調控心情：「當去睇騷，或戥其他得獎歌手高興，將佢哋嘅努力成果作為自己嘅推動力，尋晚我好開心可以睇到張學友演出。」她又勉勵Jade勿因失落獎項而傷心，覺得她是唱得之人，明年可以繼續努力。

至於組合農夫成員C君說：「唓，去得頒獎禮就一定有獎o架咩？」他自言雖冇獎攞，但過了一個愉快的晚上，皆因可跟其他歌手聚頭：「有機會同陳柏宇、Mr.、RubberBand傾合作，仲傾咗單大生意返嚟添！」另一成員陸永則發揮爛Gag本色：「我係抱住明知食白果，都搶住去食嘅心情出席o架，所以冇獎冇唔開心。我連綵排都冇份去，但知Jade有去綵排，睇得出佢好有攞獎嘅決心！」