薛家燕做亞視導師籲團結

薛家燕昨日到亞視任「演藝訓練計劃」客席導師，一眾高層、藝人在門口恭迎她。家燕姐問到在場藝員有否上足堂時，只有6至7人表示上齊，古卓文以開工為由解釋缺課，家燕姐笑說：「咁你有理由就唔會炒魷啦！」令全場掌聲四起。而有份上堂的宮雪花突然走到台前，指常遭傳媒詆毀，並拿出寫上「冤枉我不是六十七歲，還我公道，委屈我有買三盒餅，要求道歉，家燕教路。」字句。花姐此舉亦令亞視高層鄺凱迎愕然，隨即示意叫她返回座位聽書，家燕姐笑說：「你睇落似三十七啫！」令尷尬氣氛一掃而空。

亞生黃集鋒有樣學樣，突然走到台前問如何上位，家燕姐幽默地說：「你依家走出嚟經已上位，但你冇料就好快落位！」家燕姐感謝獲邀擔任導師，又以首本名曲表示兩台友好合作：「團結一心有新轉機！做好演藝節目畀大家，咁就會皆大歡喜。」而高層盛品儒表示感激友台及家燕姐，重申堅持反對發新牌：「早前有台灣政黨指港媒亂台，希望唔好有咁嘅情況出現。」另外，昨日無綫再派出《東張西望》的攝製隊及藝人許家傑到場採訪。據知，無綫一心派出曾於亞視工作的家燕姐任親善大使到亞視教書，但對方則以「回亞視」大字標題，令無綫感到不高興。