黃偉文米蘭行騷撐同志

近日不少圈中人爭取同志平權，遠在米蘭的黃偉文（Wyman）亦受好友何韻詩及黃耀明所託，邀請西太后Vivienne Westwood與他一起「撐同志反歧視」。

黃偉文於米蘭時間本月13日應英國品牌Vivienne Westwood之邀擔任模特兒行騷，成為首位登上國際時裝天橋的香港名人，謝幕時他帶領模特兒出場，並獻花給西太后及其丈夫兼創作總監Andreas Kronthaler。行騷之餘，Wyman亦有任務在身：「我喺後台趁有時間，搵西太后影咗一張相撐同志，其實我都係受何韻詩同黃耀明所託，點知佢一口答應，佢仲話可以幫我拍埋片，我覺得佢唔淨止係一個時裝設計師，仲係一個有時間就會傳遞有意義訊息畀社會嘅人。」

Wyman又表示本來計劃拿着顯示口號的電話出場行騷，但為免影響演出流程而放棄。談到騷後感受，他笑言被模特兒跣：「行喺我後面嘅男模同我講，行到台前唔應該企喺度，如果唔係會大塞車，我行完返去問人，點知個個都有喺台前停低，原來模特兒界都有勾心鬥角，真係人心難測！」

金燕玲支持立法

另外，「同志」何韻詩前晚說：「睇到集會覺得點解要咁，宗教應該導人向善，但聽到佢哋散播歧視、剝削緊其他人嘅權利，我一路講緊係一個諮詢，既然咁大意見分歧、咁多矛盾，應該有個諮詢畀大家討論，但依家講緊一個惡霸去到一個程度連諮詢都唔畀你進行，有啲過分。」她覺得事件不是宗教跟同志對抗，她也認識很多不同宗教教徒，他們的立場都是理性和包容，並不偏激。

至於蘇施黃的密友金燕玲昨日被問到是否支持反性向歧視立法？她說：「我支持所有法律禁止歧視任何人。（去遊行？）唔會刻意咁做，但我唔企出來唔代表我唔支持！」