吳日言孖男友赴日 預演婚禮當街歎魚生

吳日言（Yan）日前與圈外男友雙雙飛往日本，她說：「之前我投資咗飛鏢機生意，因為知道日本舉行飛鏢比賽，所以就即刻飛去當地觀摩吓。」寓觀摩於旅行的阿Yan坦言難忘在築地「掃街」：「當地嘅魚生真係好新鮮、好抵食，最特別係魚生竟然可以周街買嚟食，佢哋係一收到你Order，就即刻將成條魚劏開，然後再將魚生片出嚟畀你食！」她笑言在香港往往礙於藝人身份而未敢「掃街」：「喺香港因為好驚畀人影到，所以唔敢掃街，但喺日本就可以盡展我為食嘅一面！」

阿Yan又透露首次踏足浪漫勝地「彩虹橋」：「我去咗日本咁多次，都係第一次去彩虹橋，因為覺得情侶點都要浪漫吓！當日天氣好凍，不過好彩有男友做我嘅人肉暖手器！」她更笑言此行是為婚宴作預備：「我都希望同男友有多啲浪漫嘅回憶，通常情侶都會影好多浪漫嘅相，等結婚嘅時候可以喺婚宴度播番啲甜蜜片段！（幾時同男友結婚？）咁又未係時候！」