娜姐男粉絲零距離埋身

周秀娜、吳鎮宇和黎耀祥昨日到東莞出席活動，引來逾半百市民圍觀，三人舉步維艱。穿得密實的娜姐，先被女粉絲捉手，繼而被男粉絲埋身黐頭影相，嚇得她花容失色，即時彈開兼擰歪面。

周秀娜在東莞出席自助餐食店開幕，與「影帝」吳鎮宇和「視帝」黎耀祥同場，吸引大批市民圍觀，現場擠滿逾半百人，令到三人舉步維艱。以性感女神見稱的娜姐昨日雖然造型密實，但吸引力未有因而減少，先被女粉絲捉手拍照而顯得有點不開心，繼而再遭男粉絲埋身黐頭合影，娜姐只好即時彈開兼擰歪面，而在旁的鎮宇亦被擠得有點皺眉，連笑容都僵硬。事後問到娜姐可有被熱情粉絲嚇親？她笑說：「好彩個女仔冇Gel甲，我練得好身體都頂得住！（怕多人圍？）我都想同佢哋兩位男士影相啦！（唔性感？）今日好凍！我都起雞皮！」由於娜姐經常出埠工作，問會否Check實男友？她說：「唔啦！咁大個人。（除夕工作？）我喺北京做嘢。（男友？）叫佢飛過嚟囉！（怕有女埋身？）OK嘅，我會Set定啲飾物喺佢身上！」

祥仔獻唱BB踩場

至於經常出埠登台的祥仔，在台上獻唱時，有一名一歲多的BB擔任「嘉賓」，一位婆婆將手抱的一歲多孩子送上台，女主持見狀欲上前企圖拉小孩「解圍」，可惜事敗，祥仔只有照唱，場面尷尬。祥仔事後接受訪問時指粉絲斯文和熱情，最開心能與吳鎮宇一起出席活動，笑言有點喜出望外。