林峯撇語溝「帽」女

視帝中空寶的林峯前晚背着緋聞女友吳千語到中環「搵食」，期間一名打扮新潮的Cap帽女主動搭訕，兩人更愈傾愈開心，但發現記者後，林峯極速由秘道閃人！對於近日被指失獎而退出娛樂圈，林峯指仍有合約在身，退出？Impossible！

最近失落視帝的林峯，未有因而影響夜蒲心情，前晚背着緋聞女友吳千語到中環「搵食」。晚上九時許，他錄影《勁歌金曲》後乘七人車往荷李活道一間餐廳醫肚。落車後，林峯單拖入內，起初見場內大部分都是男士，但生得高大靚仔的他迅即引女埋身，甚受歡迎！期間，一名戴着Cap帽的潮女到場，並自行坐在林峯對面。由於兩人不太熟落，他起初表現冷淡，寧願擰轉頭望街也不理會對方，潮女則不停擘大口「放蚊」，但不忘「偷望」林峯。幾杯落肚後，潮女開始打破悶局，主動跟林峯聊天，而他亦沒有抗拒，只見兩人愈傾愈開心。約凌晨12時半，林峯趁Cap帽女與其他男士咬耳仔，他便開始四圍望，及至發現有記者在場，隨即撇下Cap帽女由秘道走人。

傳退出：仲有合約

近日有傳林峯退出娛樂圈一事，記者昨日致電他求證，他說：「老竇叫我幫手做生意，唔係今時今日嘅事，由我入娛樂圈已開始講！細佬今年畢業，可以由佢坐鎮先，全力幫老竇手。（有指你失落視帝意興闌珊？）攞唔到視帝同續唔續約係兩回事，況且我同TVB仲有一段時間合約，所以唔會退出娛樂圈。」而他的堂妹林夏薇則說：「作為家人點都會支持佢，但我覺得佢好啱做呢行。」

另外，無綫最近在北京成立一間新公司，據知近日已有多間內地廠商透過無綫斟林峯商演，每個出價50萬人民幣，但他為籌備下月舉行的演唱會，把近期所有演出推掉！他前晚現身《勁歌》節目時，還借傳媒隔空向樂易玲放話：「希望樂小姐由依家開始，除咗頒獎禮外唔好再安排工作畀我！內地同香港都要停工，我要閉關籌備演唱會，咁先對得住Fans，呢個演唱會係我嘅音樂總結，服裝少布到我驚凍親。（上《勁歌》谷演唱會？）內地飛炒到6,000蚊一張，香港飛太平，唔使宣傳都賣晒！上節目係為拉票，我想用番選視帝嘅8號綵帶。（唔利你？）我8號出世，上次我貪玩，搞Noise啫！」

文、攝：追蹤組