撐硬樂壇頒獎禮張敬軒無懼食白果
歌手張敬軒昨日出席聖誕派對，他透露日前首次與媽咪歡度聖誕：「媽咪嚟咗香港，有史以來第一次同媽咪過，仲搞咗個化裝派對。（有請緋聞密友關智斌、胡鴻鈞？）唔使特別請，佢哋得閒就嚟。」今日開始派發樂壇成績表，軒仔表示即使「食白果」都會出席：「曾經考慮過因為合約問題休息一年再出發，但同媒體關係好，就算冇獎都要去現場支持。」
對於今日舉行頒獎禮的新城表示缺席冇獎，軒仔稱冇問題：「每個機構有唔同機制，頒獎禮對主辦機構、觀眾嚟講係一個騷，主辦機構當然想有多啲歌手出席，令個騷好睇啲。」
