子珊3千萬行頭閃爆全場

每年無綫頒獎禮，例必成為小生花旦大騷本錢的舞台，今年視后冷門胡杏兒惟有性感行頭盡地一煲，穿單肩晚裝晒香肩，與徐子珊及楊怡等鬥搶鏡，而胡定欣更驚現疑似「阿婆底」殺風景！

昨晚假將軍澳電視城舉行的《萬千星輝頒獎典禮2012》，一眾小生花旦於傍晚6時許陸續抵達現場行紅地氈，不少花旦搏到盡性感登場，其中爭視后被睇低一線的胡杏兒惟有性感出擊，穿黑色斜膊單肩拖地長裙騷Quali，望於紅地氈挽回聲勢。杏兒戴上約550萬元的35卡鑽飾，手挽鄭嘉穎，左邊露出胸圍及香肩，疑似離罩亦相當性感，連嘉穎亦說︰「唔敢向下望。」爭獎機會低的她直認要鬥靚︰「最緊張係靚，同埋唔好踢親自己！」提到視后心水，她說︰「心水好難講，但子珊好似好勁。」

至於兩位視后大熱徐子珊和楊怡性感現身鬥餐死，行頭上子珊險勝楊怡，她穿米白色宮廷裙騷事業線，更佩戴2,800萬元的周大福鑽飾閃爆全場。心情緊張的她說︰「今日有啲嘢睇吓，但好安全，唔會走出嚟。」楊怡亦不輸蝕，戴上160卡、約2,500萬元的鑽飾，配黑色Tube Dress狙擊子珊。提到二人的行頭鬥得難分難解，楊怡說︰「哎吔！（攞獎會Book場慶祝？）冇。（返屋企同男友羅仲謙煮飯仔？）應該冇咁嘅機會，會同Fans食飯。」

定欣疑透阿婆底

此外，胡定欣和女神苟芸慧亦不失性感大晒事業線，穿上大露背低胸透視長裙的定欣露前又鬥後，可惜透視裙在燈光映照下，驚現疑似「阿婆底」。鍾嘉欣穿大露背薄紗裙，但與着穿窿裙的香香一樣甚為密實，沒有睇頭！而羅仲謙亦不讓花旦專美，穿西裝的他特地敞開胸前恤衫騷肌。