小齊台北騷子丹獻身伴奏

台灣歌手任賢齊昨晚首次在台北小巨蛋開騷，好友紛紛在微博開盤打賭小齊必會在騷上感觸落淚，小齊大呼：「死啦！點算呀！」他又稱隨年紀漸長變得感性，但開個唱是開心事，不想因喊而影響唱歌：「如果大家想贏，我勸你哋買我唔喊，但咁多好朋友嚟支持我，我都唔敢包會唔會累大家輸。」

今次個唱請來鋼琴高手甄子丹任嘉賓，原來兩人在任達華太太琦琦的子女家庭聚會認識，小齊說：「有次聚會聽到丹哥琴技，我都嚇一跳！嗰時諗到將來有機會做演唱會，一定搵佢做嘉賓，估唔到丹哥爽快答應。」小齊更首次嘗試穿高跟鞋，但一定不會穿裙或剃腳毛。