葉玉卿返美陪仔女遊埠

回港探母順道拍攝賀歲電影的葉玉卿，昨晨返回美國西雅圖。由於她前晚半夜才完成所有戲份，雖然沒有時間睡覺，但依然興奮：「好快又可以見到啲仔女！」卿卿返美後會立即與仔女到夏威夷旅行，預計本月底才會回港，參加亡母喪禮。問到是否預感母親會離世，才選擇早前返港？她慨嘆說：「我有咁嘅感覺，好似命中安排咁，不過佢已經89歲，唔係一件壞事，能夠冇痛苦已經好好！見到最後一面亦無憾。」

回港拍戲卻惹來是非，卿卿坦言自己太衝動：「清者自清！（老公安慰？）哈哈，好似我安慰佢多啲！（傳老公財政唔掂，所以安慰佢？）時間會證明！」問到返美後是否立即處理私人飛機的法律問題？她說：「所有數字，所有嗰啲問題，呢刻都唔想再講，It's Fine！我有錢定冇錢，咩問題都唔緊要，總之見到媽咪，返嚟過戲癮好開心！」

此外，有傳卿卿獲曾志偉力邀拍劇，她說：「唔係邀請，係佢有咁嘅Idea，不過20至30集時間太長，我諗未必做得到，放唔低啲小朋友！」她暫時沒有再拍戲的想法，不過會回港出席賀歲片首映禮，屆時將逗留一星期。