朱晨麗被摑流真眼淚

朱晨麗頂替因病辭演的陳法拉拍攝台慶重頭劇，外間指她「執二攤」，但她並不介懷，認為機會難得。首次拍劇的她心情緊張，還不時要在廠內跳「芭蕾舞」減壓。

前香港小姐冠軍朱晨麗，未卸任已被安排頂替因病辭演的陳法拉拍攝台慶劇《名媛望族》，雖然外間指她「執二攤」，但對新人來說卻是千載難逢的機會，這樣的二攤確實不怕執，她接受專訪時說：「我都聽到好多人咁講，但係編審叫我唔使介意，話其實試鏡試咗好多女仔，最後都揀咗我，第一次拍劇就有呢個好好機會，會好好珍惜同把握。」

首度拍劇難免心情緊張，手忙腳亂，向來淡定的朱晨麗也不例外，修讀芭蕾舞的她說：「開工初期都好緊張、好驚，因為實在好多嘢唔識，好似企位、遷就燈光，所以平時好淡定嘅我都有啲騰雞，緊張起嚟就會行嚟行去，啲同事笑我好似喺度跳緊芭蕾舞咁。」

多得松哥指點

朱晨麗在劇中與劉松仁和陳玉蓮兩位前輩有不少對手戲，松哥更素來願意提點新人，朱晨麗固然獲益良多，她說：「第一次見松哥好特別，佢要我自我介紹，講吓自己嘅古仔畀佢聽，了解吓我哋，佢教我做戲最緊要係做自己，咁樣係最舒服，開工都會示範畀我睇點樣做，好多謝松哥，拍劇之後都有保持聯絡。」她覺得陳玉蓮就好像「小龍女」一樣，感覺脫俗，其實又十分友善，不時提點後輩。

朱晨麗在劇中的角色周旋於吳卓羲和馬國明之間，為情困流下不少眼淚，她說：「戲裏面成日要喊，導演已經訓練到我可以去到對白邊一個字先流出眼淚，有一場畀嫲嫲掌摑流嘅係真眼淚，自己24年來咁大個女都未畀人摑過，嗰一刻感覺都有啲委屈。」