As One互揭怪癖

新進跳唱女子組合As One出道至今，幾乎日見夜見，但原來四位成員在練舞時，會不時「(目及)實」對方，隨時互爆鮮為人知的秘密！

由黃柏高（Paco）一手提拔的As One，成員Elfa、Oli、Shin及Nata平均年齡只有18歲，洋溢青春可人的少女味。雖然普天同慶的聖誕節將至，但四位成員都直言要以工作為先，玩樂為後，Shin說：「我哋反而希望畀工作塞爆檔期！」Elfa興奮地說：「今次係組隊後首次過聖誕，希望忙完之後可以放縱吓，一齊食嘢！」Nata亦希望跟粉絲見面：「我哋交換禮物都好滿足啦！」

由出道至今，四人每日都習舞六小時以上，問到彼此日見夜見，可有發現對方的古怪習慣？Shin一馬當先說：「唔好睇Oli咁斯文，其實佢好鍾意睇鬼片！少少嘢都嚇到佢o依嘩鬼叫，反而係我哋畀佢嚇親！」Oli即反擊Elfa情感極度豐富，她說：「Elfa雖然外表冷靜，但佢成屋都係啤啤熊公仔o架，仲會同佢哋傾偈添！有次佢睇戲見到隻熊公仔畀人扯爛咗，喊到收唔到聲。」

Shin「廣」唔掂

Elfa亦不甘示弱，指Shin的廣東話「笑死人」：「Shin係半個韓國人，佢成日亂咁用四字成語，有次佢用『百感交集』嚟形容一個『四通八達』嘅地方，聽到人哋一頭霧水！」而Nata則是公認的「低笑點女王」，其他成員經常不明白她的笑位。