甄子丹單挑梁朝偉

拍《葉問》走紅的甄子丹，明年將拍《葉問3》，而梁朝偉主演的《一代宗師》定於下月上映，子丹不怕被比較，更謙稱要向演葉問的偉仔偷師！

甄子丹與太太汪詩詩、名模熊黛林（Lynn）及吳君如等前晚出席天馬娛樂控股有限公司的周年晚會，老闆黃百鳴宣布明年將開拍電影《葉問3》，更即席與葉問次子葉正舉行簽約儀式。而子丹被問到是否繼續任男主角？他笑說：「可能唔係我主演呢！葉問電影系列係我同黃百鳴之間默契嘅成果，大家好想我哋繼續拍落去。（加片酬？）應加就加。」他坦言前兩集票房大收，令他有壓力。提到梁朝偉主演的《一代宗師》定於下月上映，問到會否怕被比較？他說：「比較係好事，等咗咁耐，我都好想睇，偉仔演技咁好，到時偷吓師！」

Lynn聞新車興奮

以露背裝示人的Lynn，提到有傳獲郭富城送新車，她興奮地說：「架車都靚。（係嫁妝首期？）作古仔唔好咁求其。」當再追問新車是否城城所贈，她即斬釘截鐵地表示不作回應。

而吳君如對於好友葉玉卿舉行記者會，否認丈夫財困，她坦言對方因報道而不快：「佢跑慣江湖，應該好快冇事。以我所知佢財政冇問題，但唔知佢老公嘅生意情況。」游說卿卿返港的她沒因而自責，更指卿卿笑說一切都是「整定」。