苟芸慧坐埋一邊爭「飛躍」

梁烈唯和宅男女神苟芸慧今年人氣爆燈，雙雙成為《萬千星輝頒獎禮2012》角逐「飛躍進步男、女藝員」的熱門，事業得意的二人均希望組織家庭。

對於「飛躍進步女藝員」獎，苟芸慧（苟姑娘）坦言期望不大：「開頭好興奮、好多幻想，有段時間好緊張，依家平常心。信心一定有，不過自己仲有好大進步空間，所以我已經做好心理準備，到時會坐喺一邊睇騷，同埋支持其他同事。」

雖然事業剛起步，但傳統觀念甚重的她已憧憬女人終身事業—「結婚生仔」，她說：「我以前計劃25歲結婚生仔，但依家覺得女仔最適合33歲結婚、35歲生B，因為要過吓二人世界先，兩個人相處要好穩定，先可以去下一步。（婚後淡出娛圈？）要睇我老公點諗，如果佢想我喺屋企照顧小朋友，我會尊重佢。」拍過四次拖的她亦開出擇偶條件：「成熟、有愛心，話到事之餘要孝順，錫我同溝通到都好緊要！」

而「關二哥」梁烈唯剛剛在馬來西亞的頒獎禮膺「我的最愛最具潛質男藝員」，其實背後他曾經歷人生低潮，更一度想退出娛圈：「以前懶音好勁，成日畀人笑，又做極都做唔好，我會諗係咪唔適合做呢行，之後我買好多發音書籍嚟苦練，最終將咬字搞番好，不過過程好辛苦。」

羨慕三哥華哥

與圈外女友拍拖十年依然甜蜜的唯唯表示，十分羨慕黎耀祥和張智霖：「佢哋係我一個好大嘅Role Model（模範），三哥（苗僑偉）同華哥（黃日華）都係，佢哋有好好嘅事業，仲有好好嘅家庭！」