成龍首映阿嬌怕醜避席

成龍主演的英皇電影昨晚在港舉行首映，片中兩位演員姚星彤和張藍心各不相讓，同樣以性感裝束出席成為焦點。相反，有份演出的「龍嫂」林鳳嬌則未有現身。

國際影星成龍主演的英皇電影《十二生肖》，昨晚在港舉行盛大首映禮。英皇集團主席楊受成博士、冼色麗、蔡志明夫婦、鍾舒漫和洪卓立等亦有出席。電影中兩位演員姚星彤和張藍心同樣以性感裝束亮相，姚星彤以一襲超低胸大Deep V裝到場，將豐滿上圍盡現人前，搶盡風頭，而張藍心亦不輸蝕以束衣谷胸上陣挽回聲勢。問到姚星彤為何如此性感，她說：「很性感嗎？還好。（有點誇張？）一點點而已。」相反演員白露娜則密實到場。

對於有份亮相電影的妻子林鳳嬌未見現身，成龍說：「我懇求咗佢好耐，叫佢包到實入場佢都唔肯，佢話怕人多，遲啲會包場睇喎！佢仲叫我由得佢啦！」

唔想香港衰

對於近日曾志偉與黃浩的糾紛，成龍表示並不知情：「聽日（今日）見到佢（志偉）會問佢，我開工都唔八卦，睇報紙見到何超儀，自己笑一笑就冇睇。（黃浩呢？）佢係邊個我都唔知。」

對於有關他對香港的言論，他在首映上說：「冇一個人想香港衰，我尊重別人嘅唔贊同，亦尊重言論自由，明者自明，唔想愈描愈黑。」他又透過微博留言表示因「愛香港，忍無可忍快言快語講出我的意見。」另外，《十》片前晚於北京舉行盛大首映，成龍大開金口獻唱，電影播放完畢全場拍掌五分鐘。