郭翠華遍踏唐三藏足迹

熱愛旅遊的本地時裝設計師郭翠華（Ranee），早前做背包客到新疆及敦煌旅行十天，遊覽了烏魯木齊、吐魯番、莫高窟及鳴沙山等。Ranee十分喜歡吐魯番，當地有不少古城及市集，但天氣十分乾燥又酷熱：「我八月去，已經唔係最熱嘅月份，但氣溫都高達四十度，呢條路係唐三藏取西經經過嘅地方，傳說中嘅火燄山就喺呢度！我去到郊河古城時，因為天氣太熱，對行山鞋熱到爛咗，呢條路專係畀人試車嘅耐熱度，可想而知地面有幾熱。好在我冇中暑，但有少少水土不服，我都食咗兩日街頭小食，真係幾好味！」

Ranee又大讚當地居民友善，她更與小朋友齊齊打波。而敦煌是一個旅遊熱點，但一年中只有半年時間適合旅遊，因為11月至3月天氣寒冷，且會刮沙塵暴，Ranee說：「應該要及早去欣賞莫高窟，因為入面嘅壁畫會隨年月而消失，有好多個石窟已經封咗唔畀入，所以趁有得睇就盡早去睇喇！」