陳庭欣讚謙謙No.1靚仔

前港姐陳庭欣（Toby）人見人愛，獲同行謝天華、鄧梓峰及森美輪流口花花對待，但問Toby誰是最愛，她指羅仲謙靚仔到車見車載！喜愛還喜愛，Toby深知謙謙緋聞滿載，保持距離才自在！

事業線騷幾多，某程度上跟見報率有莫大關係。陳庭欣（Toby）雖挾着2010年港姐冠軍之名，但近日驚醒世人之作，莫過於是在台慶上一招中門大開輕露半球，吸睛程度爆燈直逼駐台咪神高海寧。做一名索女，要人見人愛車見車載，不獨是觀眾認同，同行亦口花花搭嗲，都算係一種認證。Toby自言早前客串無綫新劇時，即搞到對手兼人夫謝天華出晒汗，吓！唔係啩？

「哈哈！Laughing哥謝天華知道我第一次拍劇，佢就同我講：『嗱！你要記住將自己嘅「第一次」畀咗我喇！佢咁講，都係想我放鬆，唔好咁緊張！不過，第一次真係非常論盡，真係論盡到好難唔記得！嗰場戲我要扮一個飲醉酒嘅索女，行行吓唔小心仆咗落天華度。我拍之前仲諗住，飲醉喎，梗係瞓身衝埋去啦！點知佢同我講：『Toby呀！其實可以借位o架，唔使真係咁大力，你搞到我出晒汗呀！』搞到我都唔好意思！」她笑哈哈地說。

森美教路

口花花的何止謝天華一人，Toby再被同劇的森美及鄧梓峰兩大司儀出口術「招呼」！Toby說：「有場戲係得我同森美、鄧梓峰同埋趙永洪清一色男藝員對戲，佢哋一見到我就笑笑口咁講：『唉！今場終於有番個索女喇！唔使日日都見到陳敏之喇！』佢哋仲教我，對腳點擺先睇落嚟對腳性感啲，又話只要我望住鏡頭撥一撥頭髮就靚晒，哈哈哈！其實佢哋對我真係好好，想個氣氛開心啲，令我易投入，第一次拍劇可以遇到咁好嘅對手，真係袋錢入我袋！」

做索女，都不是易事，人家看似風光，但Toby卻慨嘆「飛來蜢」實屬有限公司，真係少之又少，寧缺勿濫及不分國籍更是其擇偶準則：「我不嬲做開主持，同啲拍檔可能見得一兩日，譬如之前同靚仔陳智燊做活動主持，但活動完咗大家都好少聯絡，所以緣分呢啲嘢有就有，老實講，都已經咁難揀！我都唔會分咩國籍啦！」

印度結緣

你在看人時，人也在看你，Toby被宅男欣賞得多，其實她也愛睇靚仔來自得其樂！她笑說：「睇靚仔真係好重要o架！尤其入咗電視城可以睇到好多靚仔，真係開心好多o架！哈哈！」問Toby最讚好最欣賞哪個男藝人，她想也不想即說：「羅仲謙！」

Like得當然有原因，事關當年Toby參選港姐去印度拍外景，羅仲謙為外景表演嘉賓：「到依家我都覺得謙謙係No.1靚仔!其實嗰陣喺印度見到謙謙都覺得佢靚仔o架喇！早幾日我喺電視城見到一個男仔嘅側面，我心諗係邊個咁靚仔，點知佢一轉過嚟，我就同自己講：『哦！原來係謙謙！』」

如此讚嘆欣賞，還以為她會揀謙謙為No.1首選拍檔，可是答案出人意料，「哈哈！謙謙有好多新聞喎，拍劇就唔好住喇，遲少少先啦！」幾時都話食腦最緊要，嗱！呢個答案Toby話畀大家聽，港姐真係美貌與智慧並重！

後記：警察老竇貼身保護

Toby身為一名食腦索女，多得父親久經訓練。「爸爸係警察，佢經常都會擔心我入行之後，會唔會遇到唔好嘅人同事。我未考車牌嗰陣，爸爸就算凌晨兩、三點都會做我司機車出車入，而且佢不時捉我『警誡』o架！佢同我講：『你自己要小心，做任何嘢都要有底線！』所以我依家返內地工作，第一件事就係唔好周圍行，唔好走失！」