卿卿復出拍戲繼續富貴

葉玉卿（卿卿）難得返港拍戲，惹來經濟出現問題及婚姻亮起紅燈等揣測，昨日卿卿接受本報專訪時否認傳聞，她澄清今次返港為探年邁母親，拍戲只是玩票性質，與錢無關，又表示老公不時要求二人世界及再生小孩，恩愛如昔。

在美國養尊處優的葉玉卿日前回港拍攝賀歲片《我愛HK2013恭喜發財》，因而引來經濟及婚姻出現問題等傳聞。昨日卿卿接受本報專訪時，澄清今次回港主要是探望年逾90歲、半身不遂的母親，拍戲只是順便及玩票性質，並非為錢，她說：「我肯拍係因為曾志偉同樂小姐（樂易玲）不停游說我，話我經濟出現問題呢個講法好無稽，我三個仔女每年喺美國嘅學費就要百幾萬，仲有工人同其他使費，片酬夠我Cover啲乜？而且今次拍戲嘅使費，包括頭等機票同酒店嘅海景房都係我自己出。（有傳你片酬廿幾萬港元？）如果有咁嘅片酬，邵氏真係對我唔錯。今次拍嘅片酬係我當年拍一套戲嘅片酬，無減過。」問到美國經濟不景氣，卿卿經營的地產、銀行及超市生意可有受影響？卿卿說：「美國經濟係差咗，我哋做銀行係有影響，但只係數字上出入，我哋使嘅只係面嗰層，以身家過億嘅人嚟講影響唔大，只係數字上差異，有嘅嘢繼續有。」

談母親不禁落淚

至於傳與老公胡兆明感情出現危機，卿卿坦言結婚16年，當然有平淡的時候，但直到現時，老公依然會要求二人世界，她又指老公家庭觀念重，喜歡小朋友，即使卿卿已年逾四十歲，老公仍然想再生B，她說：「我都覺得自己畀唔到時間老公，我要珍惜同老公嘅時間。不過大女真係好黐身，我今次返港，走咗一日，佢已經喊住要搵我，夜晚瞓覺要瞓喺我同老公中間。」卿卿表示今次回港，每日都會花多個小時陪母親，她感觸地說：「以前失去好多同媽咪相處嘅時間，所以依家想抽多啲時間陪佢。」更一度忍不住落淚。卿卿指雖然小朋友曾要求她不要返港，但希望以身作則，讓子女有個好榜樣，將來長大後也會珍惜與她相處的時間。另外，日前胡兆明由美國往上海工作，途中特意在港停留與愛妻見面，認真恩愛。

而昨日休息不用開工的卿卿，於下午3時與長女胡芷欣離開酒店，沿途見其女兒相當害羞，全程黐住媽咪唔出聲。問卿卿有冇見過志偉？她打趣地說：「有，冚人一巴嘛！未冚之前見過，冚人之後就冇喇！（你點知？）聽人講。（信唔信志偉打人？）梗係唔信啦！飲咗酒啫！」之後她向記者示範，輕輕拍了女兒手臂一下，表示他們是玩。問她是否認識黃浩？她說：「唔識，睇報紙先知邊個。」其後途經雪糕店，兩母女食完雪糕後再外帶一個雪糕火鍋返酒店。