李蘊撻着金融才俊：30歲前結婚生仔

歌手李蘊（Renee）早前跟台灣魔術師劉謙甩拖後，旋即撻着貌似陳柏霖的內地金融才俊羅章冠（David）！據知二人絕不放過任何見面機會，早前生日的David千里迢迢人肉速遞到美國，與在當地參與魔術騷的Renee共度拍拖後首個生辰，儼如預支蜜月！昨日《好報》獨家披露一對戀人日前從美國煙韌返港的情況，Renee男友容貌亦首度在港曝光！可見Renee小鳥依人挨在男友身上，任由對方攬着其纖腰合照，高調晒恩愛！

Renee昨日接受本報電話訪問，對於有指她揚言會與男友閃婚，她說：「我哋都認真咁視對方為結婚對象。（會唔會閃婚？）結婚係人生必經階段，我哋都會以結婚為大前提，我希望30歲前結婚生仔。」她又大讚男友相當照顧她，能給她安全感，又稱與對方「講心唔講金」：「不過我擇偶條件唔係錢行先，最緊要感受到佢愛我。」另一邊廂，Renee舊愛劉謙昨日在台灣被目擊偕富家女友王希怡十指緊扣行街，更當眾攬攬。