志偉玩潛水群星幫口

曾志偉捲入黃浩被掌摑事件後，一直未有站出來回應傳聞。有指他正忙於拍攝賀歲電影，連昨日原定出席的東華活動亦失場，幸好他仍獲得一眾藝人開腔力撐。

今晚舉行一年一度的《歡樂滿東華2012》，主持之一、捲入掌摑事件的曾志偉昨日原定出席拜神活動，故有大批傳媒守候，但他最終沒有出現。節目監製何小慧透露志偉將會在節目中演出《六國元帥賀東華》，原定前晚綵排卻缺席，昨午再收到他來電指因趕戲而未能出席拜神，需要今午才作總綵排，她說：「我有問佢有冇嘢，佢話冇嘢，情緒亦冇特別，節目亦冇任何影響。」

對於志偉捲入事件，一班藝人昨日出言力撐他，當晚出席婚宴的曾華倩表示因放低利是便離開，不知有事發生：「可能當中有誤會，冇講到咁誇張！我唔識黃浩，亦冇留意佢啲新聞。好多嘢可能啲後生仔處理得唔成熟。」談到志偉的為人，她激讚冇得頂：「玩得、做得又有義氣！我唔知實情，點為之摑一巴先？我諗未必真摑一巴，未必有咁嘅事。每個人對事嘅接收都唔同，會唔會係呵護咁咋？志偉醉時係最乖嘅睡寶寶。希望唔好搞咁多事喇！」同樣有份出席婚宴的商天娥透露，當晚坐在黃浩隔籬枱，未見他與太太徐淑敏飲酒，頂多只淺嘗：「當晚係有女性朋友同我講有事發生，但我唔知咩事。（有人大吵大鬧？）唔知，全場都好興奮。」她指志偉為人樂於助人，望小事化無。

周家蔚澄清老公冇勸交

當晚擔任姊妹的周家蔚昨日亦在活動回應黃浩報稱遭掌摑事件，對於有傳老公洪天明幫手勸交，她澄清說：「佢冇！我好留意佢。我當時淨係望住新郎哥唱歌，新娘想上台去搣老公，中間好混亂，仲畀人阻住咗，好似發生好大件事咁。天明佢成晚都係同朋友傾偈，做番佢平時做嘅嘢。嗰晚我留意兩樣嘢，做姊妹就留意個新娘，做老婆就留意個老公。（擔心有女埋佢身？）唔擔心！都結咗婚，有埋餡。」她笑言佗着BB出席活動並非收兩份酬勞，只是開心價，現時懷胎八個月，仍想賺多些奶粉錢才停工，天明則打算放假兩周侍產。