最受歡迎男歌星 陳慧琳撐林峯

前晚陳慧琳（Kelly）在會展為香港中華廠商會第48屆會董就職典禮擔任表演嘉賓，對於無綫可能取消亞太區男女歌手獎，她直言是好事：「咁都好，唔使夾硬頒！依家香港歌好少Hit到其他亞洲地方，可能因為唱片市道唔好，希望大家努力！（有傳冇亞太男歌手獎令林峯變咗攞最受歡迎男歌星？）佢攞都得。（唔怕有反對聲音？）每年都有o架啦！」

提到幼子「小龍包」肥到似鄭則士，Kelly笑說：「都幾似，所以我哋都叫佢Kent哥（鄭則士洋名），蝦餃仔都覺得奇怪，明明佢係細佬，但睇落肥過自己。」不過她指「小龍包」未有超磅：「醫生話OK，依家都有Keep住食，都係食兩碗粥仔，未開始食飯，其實哥哥當時仲肥過佢。」對於早前被拍到為新片開工，Kelly指拍了四日已拍完，並坦言是為了報答導演李志毅：「因為導演先拍，我出道冇耐佢就搵我拍戲。（片酬係友情價同埋為爭獎？）純粹幫手。」她表示若再拍電影，時間太長和不在港未必會考慮。