黃貫中朱茵爭抱女

昨日黃貫中（Paul）和樂隊The Postman在銅鑼灣的貨櫃車上搭台唱街頭騷，現場逾百Fans情緒高漲，不停大叫Paul的女兒「叉燒包」，又讚「叉燒包好靚女」，還問「叉燒包叫咩名呀？」Paul唱最後一首歌時，米高峰突然冇聲，但他仍然照唱，其後落台和Fans合照，期間有女Fans推冧鐵欄。

自言忙照顧妻女、只睡了一小時的Paul，提起囡囡即冧爆：「佢一個月喇！（個樣好似你？）佢眼嘅比例比我大好多，有朱茵嘅股份，都係靚BB，依家都有過10磅重。」問到「叉燒包」是否已改名？自認「老婆奴」的他說：「要問准媽咪先可以公開喎，BB依家好乖、好好湊，我成日都同媽咪爭住抱。（生多個囉！）咁我條命又短幾年。」

有指朱茵狀態回勇，Paul稱太太還想多減幾磅，作為老公就想她休息多幾個月，又指朱茵和「叉燒包」難捨難離，相信她尚要休養多一段時間才復工。