柏豪追緋聞女友版權費

周柏豪前晚出席時尚派對時，談到緋聞女友鍾浠文將Cafe取名為「Ghost Cafe」，而他曾為對方改花名「鬼小姐」，他笑說：「我都未收佢版權費呀！（佢好重視你！）我都好重視佢，叫佢搵我做代言人啦，可以畀番錢我！」此外，他昨日出席活動時遲到，他解釋起身發覺頸椎痛求醫，證實頸椎勞損及肌肉發炎。

至於早前宣布與圈外女友Megan分手的關楚耀（Kelvin）透露，與前度仍有聯絡，還處處維護對方，叫記者不要追訪她，問到如此緊張是否想復合？他說：「暫時想專心做嘢先。（傳Megan想入行？）如果係就支持佢。」同場已轉型做DJ的黃泆潼經常在夜店打碟，她坦言曾被圈外人引誘吸毒，但會Say No，而她曾跟LMF成員阿肥拍拖，該樂隊近日亦捲入藝人涉毒事件，問到可會相信，她說：「我諗佢哋唔會喺公眾地方做呢啲嘢，同佢分開咗好耐，唔想畀咩意見，唔知有冇圈中人吸毒。」