子珊杏兒決戰馬國

視后大熱徐子珊昨日「落區」出席商場活動，大受歡迎，她更順道拉票，為自己造勢。而衞冕視后的胡杏兒昨晨到台灣拍外景，她倆今晚都會到馬來西亞出席頒獎禮，可謂預演視后爭霸戰。

視后大熱徐子珊昨日現身將軍澳出席商場活動，大受市民歡迎，司儀更指去年鄭嘉穎出席同一活動，結果成功捧走視帝，逗得子珊眉開眼笑，她說：「多得陳家碧（《雷霆掃毒》角色）效應，下星期大家每日都會見到我出活動，希望呢個勢延續到頒獎禮。（有信心先喺馬來西亞《我的最愛頒獎禮ASTRO ON DEMAND AWARDS 2012》攞獎？）我心情比想像中輕鬆，希望有獎攞啦！（當係為無綫頒獎禮預演？）唔敢期望，怕失望，兩地觀眾唔同，香港要落力拉票，我尋晚去睇Show，都向觀眾席拉票：『投8號，徐子珊！』」

盼加一半底薪

對於另一大熱楊怡自爆壓力大到爆瘡，子珊說：「唔會啩？之前見佢仲皮光肉滑，我想靚靚出席頒獎禮，近日食得好清淡。（無綫高層李寶安話無綫有得加薪同發放1.75月花紅？）未必去到我哋啩？藝員約唔同，可以嘅話，希望加我一半底薪就好啦！」

至於衞冕視后的胡杏兒昨晨隨《衝上雲霄II》劇組到台灣拍攝外景，她說：「我去一日，戲份只得一場，就喺台灣機場拍，聽日去馬來西亞出席頒獎禮。（贏面點？）個個對手都咁好戲，冇得比較，我今次壓力冇咁大，最緊要靚，之前去法國搵咗件戰衣，但我驚肥，因為件衫通窿，我想以最佳體態着呢件靚衫示人，務求全場最靚！」