唐詩詠愛．講出口

被網友封為「宅男女神」的唐詩詠，理應吸引不少才俊拜倒其石榴裙下，偏偏她卻大呻冇人追，期待一位力追她的有心人外，更相信愛是無界限，並不抗拒同性追求！

唔過電

樣子甜美的唐詩詠是不少宅男的夢中情人，理應追求者眾，豈料她自爆是深閨「宅女」，故令不少追求者卻步：「由細到大都唔多人追，可能覺得我好Cool、好難接近啦！其實我平時好鍾意留喺屋企，而且份人好慢熱，就算最初識朋友，如果只係見過一、兩次面，都唔會同人好熟。」唐詩詠入行8年，即使曾與不少型男合作拍劇，奈何鮮有傳出緋聞，來來去去只有一個崔建邦，她笑言是緋聞絕緣體：「都唔知點解咁少緋聞，其實私底下同大家都可以玩得好癲，但係Bosco（黃宗澤）、黃浩然同梁烈唯等都當我係男仔，其實我好期待下一個緋聞男友出現，哈哈！」她與「舊愛」崔建邦的關係如幻似霧，她卻似有弦外之音的說：「一直想將私人事低調處理，無論係友情定愛情，工作已經佔咗我好多時間，即使拍拖都想低調！」

唐詩詠早前在劇集《造王者》中飾演敢愛敢恨的樊紅纓，為追求真愛而不顧一切，更與情敵鬥到底，她卻坦言現實剛好相反：「我思想都好傳統，唔會主動追男仔，因為好享受被追求嘅過程，亦可以考驗對方有幾愛我。（當初崔建邦力追你？）過咗去嘅事就唔想再提！」而早前有傳她受情傷而中途轉變性取向，更盛傳與DJ拿拿淋拍拖，她澄清：「我哋識咗超過十年，同佢係一段好難得嘅友誼，佢永遠係我一個好好嘅朋友！」

身為義氣仔女嘅唐詩詠擔心緋聞會傷害身邊人，故刻意低調處理友情和愛情：「唔想因為我而令身邊嘅朋友畀人起底，有啲圈外朋友都介意人哋嘅目光！我哋做藝人要接受被評論，都好明白，但係圈外朋友唔需要！」但她亦不諱言接受同性戀：「愛情無分男女，愛情就係愛情，唔應該介意性別！（試過有女仔追你？）以前同女仔可以好Close，但係追就真係唔覺！（對女仔心動過？）好難對一個人動心，除非對方出好多力嚟追我。我亦一定唔會同人曖昧，因為好怕Get錯意思，所以如果有人鍾意我，只係暗示係唔Work，一定要同我講『我好鍾意你，你同我一齊啦！』我先會Confirm對方係鍾意我，所以如果鍾意我就要出盡力追啦！」

孭重飛

孝順的詩詠年前面對母親離世的打擊，她坦言學懂珍惜：「以前會覺得仲有好多時間，有好多工作都會話是但啦、今日唔做就聽日做，依家我要每日都活得開心、精彩，唔想浪費時間！亦一定會更加珍惜同屋企人相處嘅時間。（工作搏殺咗？）係機緣巧合，呢兩年我咁啱多咗機會，會好好把握同努力做得更好！」

劇接劇的唐詩詠，今年不但在《造王者》及《瘦薪兵團》中佔重要戲份，最近更在台慶劇《大太監》中飾演王后一角，並大爆當中的辛酸：「拍《大太監》時我連踩兩套劇，日日拍完廠景又要趕外景，高峰期試過3日3夜冇瞓過，唔好話沖涼，連落妝都冇時間，可以話係我入行以嚟體力上最大嘅挑戰。冇得瞓個人好忟憎，咁啱我同飾演慈禧嘅米雪姐有好多嗌交戲，所以拍嗰陣都係真火嚟，哈哈！」

唐詩詠雖然捱至金睛火眼，卻享受拍劇過程，全為報答家人：「入行前屋企人因為負資產，經濟壓力好大，媽咪做保險還債，佢嘅擔子好重。當時我選擇入娛樂圈，收入唔穩定，但屋企人從來冇阻止過我追尋夢想！如果佢哋當時要求我返一份朝9晚5嘅工，可能我真係放棄咗入行。當時屋企人負資產但仲諗埋我嗰份，佢哋好Support（支持）我，真係好感動！所以依家會好努力，唔想辜負佢哋，就算3日冇瞓都係等閒事，因為有機會發揮係好難得。」

後記：敬業樂業

訪問當日唐詩詠一連接受多個媒體的訪問，直至下午5時許仍未食午餐，最後只能邊食飯邊受訪。雖然鏡頭後的詩詠一臉倦容，但每每面對鏡頭，就能擺出一副精神奕奕的樣子，其充滿熱誠的工作態度，值得一讚！