羅仲謙聖誕陪楊怡

無綫花旦楊怡早前揚言會在台慶頒獎禮中投票支持緋聞男友羅仲謙，謙仔昨日出席活動時隔空回應，揚言亦會投對方一票，相信腳傷未愈的楊怡知道後必定痛楚全消！

無綫台慶頒獎禮將於下月舉行，視后大熱楊怡早前揚言會投緋聞男友羅仲謙一票，並冧爆地表示二人互相支持！昨日謙仔偕模特兒Ana R.出席COLUMBIA活動時亦「禮尚往來」，力撐楊怡做視后！他說：「會投佢又會投自己一票！（飛躍進步獎定係男配角？）兩個都有信心！」不過，他不忘激讚古明華及陳國邦演技出色，若得獎亦是實至名歸。

細心揀禮物

剛從英國拍畢劇集《衝上雲霄II》返港的謙仔，被追問有否買手信給楊怡，他避忌地說：「好多朋友都有。（送咩畀佢？）秘密，費事你哋見到佢用。節日送禮係禮貌嘅表現，聖誕禮物仲物色中。」問到是否第一年與楊怡過聖誕節，他笑說：「咁搞笑？可能同一班朋友，當中有佢好正常。」

此外，對於傳出有藝人在公眾場所吸毒，自言生活圈子正常的他並不擔心：「Party食個飯都有個譜。（叫楊怡唔好再飲咁醉？）佢嗰日同朋友聚會，所以先高興咗啲！」