警方搵黃浩查群星涉毒

近日爆出有藝人涉捲入在餐廳集體吸毒，圈中人大為震驚，餐廳老闆、徐淑敏老公黃浩承認警方已主動介入調查，更明言不會容許有人在其餐廳內「開飯」，必要時會將該閉路電視片段交予警方協助調查。

圈中名人、歌手、演員、潮人及已婚藝人被爆在黃浩的餐廳貴賓房內涉嫌吸毒，還被閉路電視拍下過程，黃浩更親證被人勒索20萬贖回該短片。事件驚動警方插手介入，並主動展開調查行動，又欲晤黃浩要求交出短片，有可能根據短片中人物作出跟進調查。有指警方曾經主動致電黃浩邀他助查，但黃浩回覆：「我冇嘢講，冇片。」亦提供不到疑勒索他的職員相關資料。

警方昨日曾到有關餐廳視察環境，但在貴賓房內未見裝有閉路電視鏡頭。黃浩昨午在電話中承認警方在其餐廳放下卡片，着他聯絡，並解釋房內何以沒有裝閉路電視：「件事係年前發生，出事後餐廳保安顧問話因為涉及私隱問題，貴賓房內唔可以裝閉路電視，所以即時拆走。」盛傳有媒體已買了該條片？黃浩指亦有聽聞：「係呀！真麻煩，我同法律顧問傾咗，件事途徑由我而來好麻煩，我一定唔會公開，除非警方要求我交出片段。」

直至傍晚，黃浩出席活動時再談及群星在其餐廳涉嫌集體「開餐」，但以警方已聯絡為由不便多談：「基於私隱為由，唔可以講片中嘅涉毒名單。（員工睇到係藝人？）個員工話好似係，但又唔可以誣衊人，因為證實唔到，可能係食咗解酒丸都唔知！若果有任何客人喺餐廳『開飯』會即時報警。」他指閉路電視螢幕放在近門口的收銀處，事件發生在周末，不排除有人路過而用手指記憶棒Copy：「平時七日就洗帶，因為發生呢件事所以冇洗到，尋日我都想睇，但要陪老婆去差館未睇。」

官恩娜冇毒友

這次疑似集體吸毒事件，圈中人無不愕然，官恩娜揚言反吸毒及反吸煙：「希望吸毒者唔好再吸毒！（有冇見過藝人吸毒？）吓！唔識圈中人吸毒，亦都冇見過。」蔡卓妍亦表示從未聽聞集體吸毒事件：「咁猖狂？（信唔信？）唔係有片咩？睇咗先信。」而節目主持杜如風昨亦開腔：「絕對唔驚！我冇去過嗰間餐廳，唔好再講呢啲。」剛為人母的郭羨妮揚言要做個好榜樣教育下一代；呂慧儀則稱未聽聞今次事件：「去過黃浩間餐廳，有次做訪問仲入過間VIP房。（受毒品誘惑？）從來都冇！梗係唔掂啦！」