蔡恩真朴喜秀他鄉遇故知

韓模蔡恩真（EJ）和朴喜秀（Heeju）孤注一擲來港發展，但始終是離鄉別井，面對壓力難以找人傾訴，EJ就試過暴飲暴食變肥妹，不過多得Heeju扶持和鼓勵，好姊妹拍住上齊齊攻陷香港模界！

本着「打天下」的心態來港，但公司卻要以大堆頭日韓模特兒作招徠，打着「Girls Kingdom」的旗號吸引客戶，個個長腿美女身材索爆，EJ和Heeju要突圍而出確實有難度。提到剛剛來港的辛酸點滴，EJ說：「我低潮嗰時接唔到Job冇收入，喺香港又冇朋友，於是開始自暴自棄放棄自己。試過日日不斷飲酒同暴食變肥妹，But Life Must Go On，慢慢再接番多啲Job，依家生活都OK。」

一拍即合

反觀Heeju則幸運地沒有遇過低潮期，一來香港便有Job，她深信「此處不留人，自有留人處」：「辛酸一定有，不過天無絕人之路。如果香港發展唔到，我可以去第二度再出發。」

EJ和Heeju難得他鄉遇故知，加上韓國人的團結特質，二人一拍即合成為密友。問到二人的友好程度，EJ劈頭第一句便說：「我喺香港淨係得兩個韓國Friend，其中一個就係Heeju啦！我真係好欣賞Heeju，佢好積極好進取，似百毒不侵咁！」而Heeju亦笑說：「唔同佢（EJ）Close，可以同邊個Close？平時如果一齊接Job仲可以用韓文交流，就算講秘密都冇人知。雖然我哋唔係一齊住，不過我成日都上去佢屋企Girls Talk o架。」