Mr.跑出迷失腳仔軟

近日因抄襲傳聞而承受沉重壓力的樂隊Mr.,在創作上遇樽頸位,幸好受新歌啟發,拍MV喪跑表達找尋屬於自己的方向,最後跑到發軟蹄!

忙於為明年一月紅館演唱會備戰及新碟錄音工作的Mr.,坦言早前一段日子感到迷失:「我哋去到一個樽頸位,完全寫唔到歌,唱片公司又係咁催我哋交歌,靈感愈逼就愈窮。」經常被指抄歌的他們承認會有無形壓力,更因而變得顧慮太多,令創作路上困難重重!幸好,Mr.遇上小克為他們的新歌《方向感》填詞,為他們解開心結,將一切謠言拋開,堅持理想找屬於自己的路,五子說:「方向係要靠自己尋找,其實做人最簡單不過,抱着隨緣嘅心,就好似今次編曲回歸最簡單方法,彈唱都冇花巧,新嘅歌就係新一年新序幕。」

日前,五子為《方》歌拍攝MV,為表達出迷失感覺,他們由土瓜灣跑到大角咀,繼而過海再跑電車路,清晨時分還跑上飛鵝山睇日出,最後跑到腳都軟,Mr.說:「當日我哋日間有工作,夜晚先再拍通宵MV,足足踩咗廿個鐘。」有夜跑習慣的Dash笑言跑到發軟蹄:「我哋跑上飛鵝山嗰段路最辛苦,衝到上去真係開心到大嗌!」

Alan跑樓梯減肥

主音Alan最近迷上跑樓梯,事緣日前居住的大廈停電,他要行樓梯上樓,雖然感到辛苦,但驚覺這是一個不錯的運動,他說:「我知校長(譚詠麟)開騷時都有跑樓梯減肥,真係好得o架!我跑咗兩個星期已經瘦咗10磅,希望之後Keep住。」

音樂組

一度迷失的Mr.找到新方向,故以「跑」作為MV主題。

Mr.拍MV踩足二十小時,終跑到飛鵝山舒一口氣。

Alan愛上跑樓梯,寓Keep Fit於練氣。

Tom跑時長髮飄吓飄吓,夠晒動感!