徐偉棟兩面打仔勁兇狠
影星徐少強及雪梨之子徐偉棟最近在英皇電影《紮職》中飾演打手角色，跟主角陳偉霆拍住上，戲份不少，身形魁梧的他更有連場打戲，他自認拍動作戲較文戲易上手：「角色性格有兩面，平時好純良，打起上嚟就好狠，我覺得自己拍打戲比較自然。」片中他因拯救湯怡而產生感情，其後更結婚生仔，但他笑言可惜沒有親熱戲：「唔好嘥吖嘛！有少少會交代得更好！」談到角色見義勇為，原來偉棟亦同樣愛為朋友出頭，小時候曾打交至周身傷：「好在都只係皮外傷，屋企人知道好嬲，阿婆最錫我，打我打得最勁！細個係坐唔定，年少氣盛嘛！大個完全唔同晒。」
