陳靜睇好百變小萱贏女配

寫真o靚模個個爭住轉型做演員，其中陳靜成功突圍，更提名金馬獎最佳女配角，她反而睇好勁敵范曉萱，大讚對手百變！

繼周秀娜後，陳靜（DaDa）是另一位轉型闖影圈的成功模，更憑《低俗喜劇》中「爆炸糖」一角提名台灣《第49屆金馬獎》最佳女配角，與范曉萱、郭采潔等台星爭逐，DaDa對此非常興奮，為明日（24日）舉行的頒獎禮到時裝店嚴選戰衣，上圍澎湃的她專攻Tube Dress或Deep V款式，以凸顯最大「胸器」。

好角色更勝好演技

DaDa今日（23日）赴台，心情緊張的她表示對得獎信心不大：「始終演戲經驗少，今次提名已經賺咗，如果依家畀個獎我，反而有壓力。」競爭對手中，DaDa最看好范曉萱：「幾鍾意佢，以前已經有聽佢啲歌，到佢拍電影，電影中嘅佢可以變成另一個人，認唔出係佢，好成功，形象好多變。」提到與出道多年的范曉萱等演技派同獲提名，DaDa謙稱有運：「唔係因為我演技好，係我遇到好角色。套戲帶畀我好多，多咗好多戲搵我，真係好開心，但會抱學習態度，要努力，否則唔會行得長，好開心可以轉到型，到我真係夠經驗，就會想得獎。」

問到心目中最佳女主角，DaDa表示最喜歡周迅，至於今屆提名金馬影后的五位女星中，DaDa對桂綸鎂讚不絕口：「講到台灣電影，近年最多產同最有印象就係佢。」她又踢爆好友杜汶澤也是桂綸鎂的Fans。由於阿澤同時提名男主角和男配角，DaDa擔心他的票數會被分薄，又賣口乖指對方是她心目中的最佳男主角，同時希望《低俗喜劇》能獲得多個電影獎項。