阿澤「理虧」捧中基青雲

入行19年的杜汶澤寫下金馬獎歷史一頁，成為盛會創立49年來首位同時入圍最佳男主角及男配角的演員。對於能否捧獎歸，他直言抱着「入圍當贏」心態，反而為對手鄭中基拉票，更推舉劉青雲可勇奪金馬影帝。

近期杜汶澤身處杭州趕拍賀歲片，今次憑《低俗喜劇》入圍角逐金馬影帝，與強敵張家輝、謝霆鋒、劉青雲及有主場之利的張孝全拗手瓜，同時亦憑英皇電影《DIVA華麗之後》入圍最佳男配角，苦戰《低》片拍檔鄭中基等（見另文）。阿澤表示平常心面對，對於最佳男配角，他明言首選鄭中基：「當日佢接受咗個低到不能再低、兄弟到不能再兄弟嘅片酬幫手拍《低》片，佢嗰幾個鏡頭根本就係全片精髓所在，自知虧欠咗佢好多，我無時無刻都想送樣嘢報答佢。如果佢最終成為最佳男配角，我即刻鬆咗口氣！」

戰衣選着「送殯裝」

至於影帝之爭，阿澤同樣「長他人志氣，滅自己威風」：「劉青雲演技好毋庸置疑，論資排輩點都應該輪到佢喇啩？（謝霆鋒呢？）當年佢喺《十月圍城》嘅演出，早就應該攞，嗰次唔攞今次先攞？」對於自己的得失成敗，阿澤坦言不會放在心上，但對導演彭浩翔未能憑《低》片入圍爭導演獎，令他有所遺憾。

問到明晚（24日）頒獎禮戰衣問題，阿澤即發揮搞笑作風說：「冇時間搞喇，屋企有套單吊西，正所謂去飲又靠佢，送殯都靠佢，攞番出嚟應吓急，最多喺機場買個煲呔配襯囉！」