葉佩雯搞婚宴發噩夢

已拉埋天窗一年的葉佩雯（Grace）和Eric Kwok（郭偉亮），今晚會在酒店筵開35席補擺喜酒，昨日他們先一同取裙褂和禮服，兼為婚宴做最後準備，之後暫別一晚，跟足傳統各自上頭，Grace更大爆緊張得晚晚發噩夢！

今日是Grace和Eric Kwok結婚一周年紀念，亦是補擺喜酒的大日子。去年11月23日Eric在自己的演唱會上跪地求婚兼即場註冊，今晚他們會到北角海逸君綽酒店設宴35席。郭氏伉儷一直走在最「潮」線，雖說在婚禮前一晚男家女家不應相見，但他們卻一同撲東撲西，為喜酒作最後衝刺。兩人奔波勞碌了一個下午，走勻港九新界，就是為了取裙褂和禮服。

Grace雖戴黑超，但仍感受到她心情勁靚，取過裙褂後便和媽媽及婆婆坐的士返酒店，下車後拎住一袋二袋的她表示將在酒店過夜：「今晚分開過夜，大家都要上頭。（係咪會跟足傳統？）哈哈，其實唔應該見面，但頭先都見咗！（心情緊張嗎？）攰多過緊張，呢排日日瞓得4粒鐘，上星期仲晚晚發噩夢，夢見好大頭蝦咁唔見晒啲金器，又夢見搞婚禮啲朋友個樣！」她表示大致上準備妥當，只是座位安排最麻煩：「到依家都仲改緊，搞咗勁耐，我都叫身邊啲朋友諗清楚先好結婚！」

櫻花主題

此外，婚禮負責人透露由於Grace非常喜歡櫻花，所以今晚的婚宴場地亦會以櫻花為主題，場內更會有一大棵假櫻花樹，就連姊妹裙、結婚蛋糕和送給賓客的禮物都有櫻花。另外，劉浩龍（師兄）前晚出席電視劇《第二人生》煞科宴，他表示會為Eric和葉佩雯婚禮做兄弟，並笑說：「班姊妹話要我哋死！Eric叫我哋自己小心啲，佢話佢都控制唔到佢老婆！不過玩還玩，唔好整亂我個頭同件衫就得啦！」