李嘉欣肚凸凸講生仔

最近盛傳再懷孕的李嘉欣昨晚出席活動時腹部微隆,被問到是否懷孕時卻不置可否,但直言母性大發想生B,惟老公許晉亨怕逾7,000呎的豪宅太細,容納不下新成員。

大美人李嘉欣昨晚出席BOUCHERON全球第一最新形象店香港開幕禮,與品牌全球行政總裁PIERRE BOUISSOU先生及PPR亞太區總裁鄧婉穎一同剪綵。傳成功做體外養卵懷有第二胎的她着四吋高跟鞋,但腹部微隆,更要助手扶上扶落,她說:「着咗四吋高跟鞋,好危險呀!」問到是否懷孕時,她避重就輕說:「哈哈!我諗應該唔係。(係咪怕小器?)唔知,唔可以講得畀你知,我冇所謂,心大心細諗緊有定冇。(好疑惑?)有時見到囝囝大得好快,好想重溫佢細個好得意嘅嘢,但有時佢好曳,殺咗我都唔想再生,總之等個天決定,順其自然,好難控制。」答得相當玄妙。

默認不設防

嘉欣坦言老爺奶奶沒有催她再生B,老公許晉亨亦反應冷淡,她說:「老公驚間屋已經好細,再有小朋友就逼爆,如果生男仔要買多啲車,生女仔要整到粉紅色公主屋咁。」其實「嘉亨」住在曉廬一個逾7,000呎的相連單位,家有7,000呎都怕生多個逼爆屋,許晉亨非常幽默!

問到會否嘗試人工受孕,嘉欣說:「年紀再大啲,真係唔得先算。(依家不設防?)OK,唔使講到咁細節。」她承認肥了,但否認有孕味,只是所穿的衣服營造了懷孕的效果,她笑說:「唔使養肥自己生B。」

名人組

腹部微隆的嘉欣企定定拍照,笑到四萬咁口。

嘉欣出入相當穩陣,不時扶着實物避免跣腳。

嘉欣(右起)、PIERRE BOUISSOU及鄧婉穎為新店剪綵。