子珊震驚林莉促嚴懲

圈中爆出藝人在食店涉吸毒，哄動全城，不少藝人對此感到非常震驚，直言難以置信！

徐子珊：「件事都幾震驚，我都有聽過有藝人吸毒，不過我冇親眼見到，咁啱之前拍完劇集《雷霆掃毒》了解多咗毒品方面嘅嘢，覺得應該要正視，之後都想從呢方面做多啲教育嘅工作。」

林莉：「我身邊冇吸毒朋友，自己連煙都唔食。（公眾場所吸毒太猖獗？）覺得佢哋好可憐，借毒品麻醉自己，好可悲，如果喺公眾地方做啲咁嘅嘢，仲過分，要嚴懲，一定唔恰當。」

過來人吳浩康：「都唔知件事係咪真嘅，我唔方便回應，但係吸毒就一定唔好，犯法之餘對身體都有害，唔關喺乜嘢地方嘅問題，我絕對唔支持。」

過來人周永恒：「其實面對壓力有好多解決嘅方法，吸食毒品只係幫到眼前一刻咩都唔理，但係呢個係一個惡性循環，只會愈踩愈深。（你點減壓？）減壓有好多種方法，可以做運動，我會用講嘢去減壓，如果明知吸毒會賴嘢都依然去做，我冇嘢好講。」

葉佩雯：「我冇聽過，唔清楚呢件事！」

馬詩慧：「呢樣嘢唔好話係藝人，係人都唔啱，係犯法嘅，喺公眾場所更唔恰當，尤其係公眾人物嘅身份，係一個壞榜樣，會影響形象，令Fans同鍾意佢哋嘅人失望，可能會有樣學樣。」

黃智賢：「我冇接觸過吸毒嘅朋友，軟性毒品喺夜店流傳一定有，不過年輕人真係唔好試！如果係真正嘅朋友，係唔會叫你掂毒品嘅！（圈中吸毒風氣犀利？）電視圈應該就冇，同事多數好正派，藝人壓力比較大，不過總有其他嘅宣洩方法，千祈唔好掂毒品！」

黎耀祥：「我未見過，自己唔夜蒲，吸毒都係年輕人。（藝人壓力大？）邊關事，任何人都壓力大，睇吓自己點樣Handle啫！其實吸毒對健康、生理都有好大影響，絕對不可試，藝人形象好緊要，某程度一定要注意品行。」

詩雅：「好誇張！可信性唔高，喺食肆我覺得冇可能，如果閂晒門窗就有可能！」

溫碧霞：「作為藝人要保持形象，呢件事好奇怪，但做藝人要自律。」

陳偉霆：「唔知真定假，如果係真梗係唔可以，影響形象，絕對離譜！」

Jeana︰「藝人要自重，被不法之徒利用就唔好啦！自己唔會咁做，呢一行咩人都有，咩事都會發生。」

日模松岡李那、韓模蔡恩真：「好驚訝！唔知！冇聽過，如果真係有人喺食肆吸毒，真係好黐線，因為會有好多人見到，冇見過人吸毒，冇人引誘我哋。試過一次去內地做嘢，喺間夜店度，經理人話見到有個人喺我哋身邊吸毒，經理人嚇到喊，吸毒喺日本同韓國都係犯法，會畀人拉。」