群星涉餐廳吸毒

娛圈涉毒問題司空見慣,昨日盛傳有人四出兜售一條短片,內容涉四女一男、知名度極高的藝人在餐廳吸毒,而該餐廳正是藝人徐淑敏老公黃浩有份投資!黃浩承認昨日曾收到勒索電話,並揚言看過有關短片,問黃浩該短片內是否有藝人在他的餐廳吸毒,他直認不諱:「我覺得係!」

圈中吸毒問題屢見不鮮,更有傳娛樂圈有人專責供應毒品給好此道的藝人,當中包括一些當紅藝人,他們吸毒的習慣更是娛樂圈公開的秘密!昨日,傳有人四處兜售一班在娛樂圈甚為活躍、極具知名度的四女一男藝人,公然在餐廳貴賓房涉嫌吸毒的短片,當中包括歌星、名人、潮人及演員,其中更有已婚藝人!而眾人涉「開餐」之餐廳正是前港姐徐淑敏老公黃浩在銅鑼灣有份投資的餐廳,黃浩昨日亦聲稱遭人勒索,要求用廿萬贖回該短片,但已被黃浩拒絕!

疑餐廳員工偷錄

黃浩昨日在電話中向記者承認確有人致電給他,向他兜售一條一班圈中人在其餐廳吸毒的短片,黃浩說:「係!確係有人向我兜售呢條短片!(勒索廿萬?)係!(你有冇報警?)由於唔知對方係乜嘢人,如果佢再打嚟,我就會報警!(你係咪睇過條短片?係咪有藝人喺你間餐廳吸毒?)我覺得係!」

據知該條短片之出處,涉嫌是曾在黃浩餐廳工作之員工,偷偷在公司用手機錄下餐廳閉路電視之錄影,片段中有一大班人食飯歡聚,當中包括多名極具知名度,並於圈中甚為活躍的藝人,眾星在潮人界、藝能界都甚有名氣,他們竟公然在餐廳內吸食大麻及丸仔等毒品,完全無視法紀!未知眾星是否受到藥物影響,更在餐廳貴賓房內大吵大鬧,狀甚瘋狂!

未知是否因不想太太徐淑敏擔心,故記者致電給徐淑敏時,她揚言對勒索一事不知情,她聽畢事件後,被問到會否很擔心老公?她甚有信心地說:「冇人勒索到我老公嘅!」對於黃浩親口承認在短片內確有藝人在其餐廳涉吸毒,徐淑敏則表示從未見過藝人吸毒:「我從來冇見過人吸毒,更加冇見過有人喺Kenny(黃浩)間餐廳吸毒。」

警方主動介入調查

「娛圈五毒」涉嫌在餐廳內吸毒,片段被閉路電視拍下,餐廳員工用手機偷拍閉路電視片段後,向餐廳老闆「兜售」,勒索不果再向傳媒兜售。黃國桐律師說:「『吸毒』唔係罪名,但無論佢收喺邊都係『藏毒』,會判去戒毒所。而佢哋除非各自帶毒品,否則一人帶去五人吸就係分享,咁就算『販毒』,會由地方法院審理,判刑二至四年,就算分量極少都罰好重。」至於涉嫌勒索餐廳老闆的員工,會由地方法院審理,黃律師說:「佢恐嚇勒索,會判即時入獄,加上佢『員工』身份,破壞咗公司對佢嘅誠信,因此再加刑半年。員工將偷拍得來嘅片段向傳媒兜售,買賣雙方冇咩大問題,但員工係『偷拍』就侵犯閉路電視版權,但傳媒冇公開播放就唔涉及法律問題。」

至於餐廳老闆雖然沒有被成功勒索,但沒有立即報警,他將會一身蟻,黃律師表示警方一定會主動介入事件:「警方係滅罪,唔使有人報警都會主動調查,嗰班人喺餐廳吸毒,係挑戰法紀,非常嚴重,不能容許。雖然知情不報唔係犯法,但餐廳老闆作為持牌人就好有問題,政府發個牌畀佢營商,但佢知而不報即係縱容罪行,不是好持牌人,警方會反對佢名下餐廳續酒牌同食牌,因為每年續牌,有咁嘅紀錄要搞飲食就好麻煩,就算上到法庭,佢唔可以話『唔知』,因為員工勒索佢嘅時候佢已經知道咗,所以佢唔可以置身事外。」

影視組

黃浩有份投資的餐廳涉藝人吸毒短片,他與太太徐淑敏大表驚訝!

4女1男娛圈五毒

黃國桐律師