黃智賢：唔恨得咁多

黃智賢（Ben）坦言選友相當「揀擇」，圈中好友全是識了10年以上的好兄弟，眼看身邊好友張家輝、鄭嘉穎等個個大紅大紫，有時會有種比下去的感覺，惟有學會自我調適！

我圈中朋友唔算多，因為我個人「揀擇」，講得出好老友嘅都係識咗十幾年，鄭嘉穎、曹永廉、鄭子誠、張家輝、郭晉安、張錦程……出到嚟會乜嘢都講，互相講對方太太，好多家庭問題都會講！張錦程就識得最耐，由中學同學識到依家，屋邨住喺隔籬，有時好多嘢唔使講太多佢都會明。

際遇不同冇得計

每個人食嗰碗飯都唔同，你自己溫飽、滿意就得，我冇話特別好羨慕，唔恨得咁多，家輝如是、嘉穎如是！咁多年身邊嘅人大紅大紫，攞獎攞到不得了，人人都有，各有各際遇！呢啲都係我信仰令我嘅心情調整到，因為冇得比較，人哋又話幾多十萬元一部戲，呢個又話一齣電影攞五個影帝，嘩！你有冇狼啲呀？我會替好朋友開心，各有際遇不同！

有時都會有比下去，呢方面嘅諗法一定會有，同佢哋出去食飯，啲人湧晒去佢哋度影相，又冇人理我，呢類咁嘅場面要自己調適，如果唔係做唔到好朋友。呢一行始終有高低，會有比較，係人哋將你哋比較，只有就係唔好諗呢啲嘢，正如出嚟食飯，一定喺公眾場合，就算個侍應都係叫佢哋影相唔叫你，咁你點啫？呢啲場面，你一定會遇到，有時另一種心態我好替佢哋開心，因為係識於微時嘅朋友，都可以講係一種成就嘅象徵，去到邊都有人圍你，得來不易，非必然要有，唔係用年資去計！

（明日待續）

口述：黃智賢　

筆錄：韋芷茵