黃智賢誓冧莊男配

去年當選無綫頒獎禮「最佳男配角」的黃智賢（Ben），有望今年憑《雷霆掃毒》二度問鼎男配，做史上首位冧莊男配角！最新的無綫年曆都見到他的蹤影，無疑是很大躍進！

拎完「男配」，今年嘅機會相對上年嚟講進步咗，唔係話自己嘅演出，而係受注意嘅程度，公司擺位嘅程度。上年「辣薑」連海報都冇得影，劇集嘅宣傳片、海報各樣，相對於今年其實係好大嘅進步！公司喺你身上投放希望，我同樣想對公司有個交代，有伯樂，你係咪千里馬？都要證明畀人睇，唔好辜負公司同觀眾嘅期望。

至於係咪畀我冧莊？有啲人話上年畀咗我，今年唔會畀，咁視帝都有得冧莊，點解男配唔可以冧莊啫？當我為自己講說話，畀我嘅，我開心，今年好多不容忽視嘅對手，《大太監》又未出，《名媛望族》又出緊，公司做得好嘅同事其實好多，唔一定係畀你，我哋呢啲老皮老骨惟有咁講！

企第一排又如何

亮燈、台慶影大合照，企前排企後排，呢啲都係好現實嘅問題，都唔係話「潛」，都冇「潛」到，明規則嚟o架喇呢啲！始終一個電視台商品係演員嘅時候，你都要睇睇擺啲咩嘢貨出嚟，有時會係一個唔舒服嘅現實，今年亮燈我企第二排囉！睇開啲喇！第一排又企過，你問我邊年我唔記得，舊夢不須記，第十排又企過，十幾排又企過，個遊戲係咁樣，咁企到好後嘅同事又如何呢？佢哋都係公司一分子，都係歡歡喜喜返嚟影張相。（明日待續）

口述：黃智賢　筆錄：韋芷茵