劉謙上新歡香閨 舊愛李蘊呻：我唔敢去諗

年屆36歲的台灣人氣魔術師劉謙鍾情o靚模，繼今年七月與李蘊分手後，日前身在北京的他被發現與比他年輕十歲的有米o靚模王希怡返香閨，原來兩人早於四月已晒「密照」。對於劉謙有劈腿之嫌，舊愛李蘊慨嘆：「我真係唔敢去諗。」

劉謙看來對中港兩地o靚模情有獨鍾，去年六月來港拍攝無綫節目時認識李蘊而火速撻着，其後李蘊因「空降」台灣找愛郎慶祝20歲生日令戀情曝光，但關係維持一年即告玩完！而一向緋聞不絕的劉謙，原來在北京亦有留情，這次緋聞女角王希怡是富貴o靚模，其家族在全球擁有多間餐廳，是「第三代」傳人，身家雄厚。

日前劉謙與王希怡及內地演員夏雨等相約吃飯，素顏的王希怡戴上黑框眼鏡，兩人離開飯店後，由劉謙駕車直闖王希怡香閨。而王希怡落車時左手拎着高跟鞋，右手捧着汽水；拿着大袋的劉謙隨她步入寓所。其實他倆戀情早已有迹可尋，劉謙四月來港開魔術騷，當時李蘊以「女主人家」身份捧場，王希怡則在微博晒與劉謙肩並肩的「密照」似向李蘊示威，並留言：「沒有看到劉謙的魔術，只好期待28號你在北京的演唱會。」難免令人懷疑王希怡當時有做「小三」之嫌！

「只可以講我太善良」

昨日記者聯絡上李蘊，對於舊愛劉謙在北京有新戀情，她說：「冇乜感覺喎！都已成過去，亦唔會唔開心。」提到王希怡四月時晒「密照」？李蘊承認四月仍未分手。至於是否遇「風流情人」？她淡然說：「唔開心都冇用，都過咗去，大家冇聯絡，只可以講我太善良。（唔嬲咩？）我情願畀人鬧低B、白癡，好過畀人話小器，所以唔會埋怨劉謙。（分手因為有第三者？）我真係唔敢去諗，當時我係相信佢，我唔想似長舌婦，總之依家我好開心，亦有圈外發展嘅人。（覺得劉謙好花心？）當初都有朋友講話佢係花心嘅人，但愛情係盲目嘅，咁人要經歷過先會成長，我會祝褔佢哋。」而她將於月中到美國拉斯維加斯為魔術師Nathan Burton做嘉賓，看來仍與魔術很有緣！